Elbasynyń bıylǵy Joldaýyn talqylaýǵa arnalǵan aktıvtiń jınalysynda oblys ákimi Erlan Qoshanov aýdan ortalyqtary ishindegi joldardy jóndeýge qarjy qarastyrylǵanyn atap ótti. Buryndary bul júktemeni aýdan ákimdikteri men respýblıkalyq qazyna oryndap keldi. Endi joldardy qalpyna keltirý sharalaryn oblystyq bıýdjet esebinen iske asyrýǵa sheshim qabyldandy.
«Qaraǵandy oblysynyń tranzıttik áleýeti zor. Búgingi jaǵdaıdy eskere otyryp, biz bul basymdyqty tolyq deńgeıde paıdalana alýymyz kerek. Memleket basshysy joldardyń jergilikti jelilerin jóndeý men qaıta salýǵa qatysty qarjylandyrý somasyn arttyrýǵa tapsyrma bergen bolatyn. О́tken jyly eleýli jumystar atqaryldy, ıaǵnı 863 shaqyrym jol jóndeýden ótti», - dep toqtaldy óńir basshysy.
Belgili bolǵandaı, 2018 jyly Ortalyq-Ońtústik dálizindegi Qaraǵandydan Temirtaýǵa deıingi aralyqta jumystar aıaqtalady. Osy jylǵa Qaraǵandy-Jezqazǵan jolynyń ýchaskelerine ortasha jóndeý sharalary, sonymen qatar ózge de joldardy qamtý josparlanǵan. «Aǵymdaǵy jyly bıýdjetten joldardy jóndeý jumystaryna 39 mlrd 100 mln teńge bólindi. Bul óz kezeginde 800 shaqyrym joldy qamtýǵa múmkindik beredi», - dep naqtylady E. Qoshanov.
Atap aıtqanda, bıyl oblystyq ári aýdandyq avtojoldardaǵy tórt kópir qaıta salynbaq, sondaı-aq Qarabas-Jantas jáne Aqtoǵaı-Balqash baǵyttaryndaǵy problemaly ýchaskelerde kúrdeli jóndeý júrgizilmek.
