Aqtóbe oblysy qajet mamandy ózderi oqytady

Búginde atalǵan sala maman­dary eýrostandarttarǵa saı is-qımyl tanyta almasa, isker­ligimizge syn. О́ıtkeni shetelderden keletin qonaqtar men týrıster eldik damýdyń deńgeıine birinshi kezekte qonaqúıler men meıramhanalardaǵy qyzmet kórsetý sapasyna qarap, ólshem jasaýy ábden múmkin. Iаǵnı mundaǵy basty qaǵıda bireý ǵana – kórsetiletin qyzmet túrlerin álemdik talaptar normalarynan kem túsirmeý.

Osy oraıda Aqtóbe aımaǵynda erekshe bir jobanyń tusaýy kesildi. Oblys ortalyǵyndaǵy iri kásiporyndardyń janynan arnaıy oqytý ortalyqtary ashy­lyp, jumys isteı bastady. Oǵan jumyspen qam­tý ortalyqtarynda jumys­syz retinde tirkelgender qabyl­danady. Oqý merzimi – eki aı. As­paz, daıashy jáne ákimger ma­man­­dyǵyn alyp shyqqandarǵa memlekettik úlgidegi sertıfıkattar tapsyrylady.

Úkimet tarapynan oqytý or­talyqtary úshin tıisti qar­jy­lyq qoldaý kórsetilip otyr­ǵanyn da aıta ketken jón. Soǵan saı ár oqýshy úshin 24 myń teńge kóle­minde tólem tóleý sharalary belgilengen. Bul qarajat oqy­týshynyń eńbekaqysy men ózge de materıaldyq shyǵyndardy óteýge jumsalady.

Biz taıaýda oblys ortalyǵynda qyzmetin bastaǵan jańa qury­lymdardyń biri «Damytý» oqytý ortalyǵynda bolyp, qyzmetimen tanysqan edik. Bul ortalyq «Aq­tóbe oblysynyń qonaqúıler men meıramhanalar bıznesi» qoǵamdyq birlestigi janynan qurylypty. Ol «Zere» meıramhanasy bazasynda ornalasqan. Jańa mamandyqqa qaıta ázirleý kezinde kýrs tyńdaýshylaryna aı saıyn 17 myń teńge kóleminde shákirtaqy tóleý tártibi or­ny­ǵypty.

Bul jerde tájirıbelik sabaq­tardy júrgizý úshin arnaıy kabınetter uıymdastyrylǵan. Orta­lyqta joǵaryda aıtylǵan maman­dar daıarlanady. Bul rette kásipqoı bas aspaz ben meı­ram­hana ákimgeri kýrs tyńdaý­shy­laryna taqyryptardy to­lyq túsindirip aıtyp beredi. Budan ári tájirıbelik sabaqtar jalǵasady. Damytý ortalyǵyna qabyldanǵandar tek bas aspaz ben bas ákimgerdiń tálimimen shektelmeı, «Aqtóbe oblysynyń qonaqúıler men meıramhanalar bıznesi» qaýymdastyǵy mú­sheleri men Aqtóbe qala­syn­daǵy dámhana jáne meıramhana ıeleriniń dáristerin qosa tyńdaıdy.

Oqytý ortalyǵynda aspaz isi men basqarý menedjmentine baǵyttaýdyń keshendi is-jos­pary bekitilgen. Oǵan oblys­tyq kásipkerler palatasy men jumyspen qamtý orta­lyq­ta­ry­nyń mamandary tartyl­ǵan. Bul jóninde «Zere» meı­ramhanasynyń dırektory, ob­lystaǵy qonaqúıler men meı­ramhanalar bıznesi qaýym­dastyǵynyń tóraıymy Baný Tilegenova aıtyp berdi. Ol bú­ginde meıramhana men qonaqúı bıznesi salasynda jańa tur­pattaǵy kadrlarǵa suranys jyl saıyn ósip kele jatqanyna toq­talyp ótti. Sondyqtan arnaıy oqytý ortalyǵyn ashý jóninde uıǵarymǵa kelipti.

Mundaǵy maqsat – atalǵan bıznes salasyna qajetti kadr ázirleý. Ári kýrsty bitirgennen keıin olardyń jumyssyz qal­maýyna basa mán berý, deıdi B.Tilegenova. «Damytý» ortaly­ǵynda oqýyn aıaqtaǵan 20 ákimger men 30 aspazdyń 80 paıyzy sanaý­ly kúnderdiń ishinde jumysqa ornalasyp ta úlgergen.

Aqtóbe oblystyq kásipkerlik palatasy adamı kapıtaldy da­mytý bóliminiń basshysy Dá­meli Qunanovanyń aıtýynsha, aqtóbelikterdiń bul jobasy Eńbek jáne halyqty áleý­met­tik qorǵaý mınıstrliginiń qol­daýyna ıe bolypty. Jobanyń erek­sheligi, jumys berýshiler ózderine qajetti kadrlardy óz­deri ázirleıdi. Iаǵnı kýrsty aıaq­taǵan soń jumyssyz qalamyn de­gen qaýip týmaıdy.

Temir QUSAIYN,

«Egemen Qazaqstan»

AQTО́BE

Sýrette: tájirıbelik dáris­ten kórinis