Pedagogıkalyq oqý ornynyń professor-oqytýshylary men qyzmetkerleri qatysqan alqaly jıyndy oqý jáne tárbıe isteri jónindegi prorektory Abaı Qurmanqulov ashyp, júrgizip otyrdy.
– Prezıdent bıylǵy Joldaýdyń «Adamı kapıtal – jańǵyrý negizi» atty jetinshi basymdyǵynda bilim berýdiń jańa sapasy týraly keńinen aıtyp, otandyq joǵary oqý oryndarynyń aldyna tyń mindetter qoıdy. Onda pedagogtardy oqytý jáne olardyń biliktiligin arttyrý joldaryn qaıta qaraý qajettigi jaıynda, elimizdiń ýnıversıtetterindegi pedagogıkalyq kafedralar men fakýltetterdi damytýǵa toqtaldy. Sonymen qatar, bilim berýdiń barlyq deńgeıinde matematıka men jaratylystaný ǵylymdaryn oqytý sapasyn kúsheıtý qajettigine de nazar aýdaryldy. Qorytyndylaı kele, jańa Joldaý Memleket basshysynyń ótken jyldyń qańtarynda jarııa etken Úshinshi jańǵyrý basymdyqtarymen, sondaı-aq, «Bolashaqqa baǵdar: rýhanı jańǵyrý» baǵdarlamalyq maqalasymen etene sabaqtas. Prezıdenttiń bıylǵy Joldaýy bizdi jigerlendiredi jáne keleshek úshin jaýapkershilikti arttyrady, – dedi ol.
Adamı kapıtaldyń sapasyn arttyrý – memleket damýyn qamtamasyz etýdiń negizgi alǵysharty. Qoǵamnyń zııatkerlik áleýetin ilgeriletýdi júzege asyrý pedagog kadrlarǵa tikeleı baılanysty. Osy oraıda Elbasy Joldaýdyń jetinshi negizgi mindetinde bilim berý júıesiniń barlyq deńgeıi zaman shyndyǵy men ekonomıka suranystaryna jaýap berýi tıis ekendigin jáne bul arada muǵalim mamandyǵynyń bedelin arttyrý qajettigin alǵa tartty. Osyǵan oraı basqosý barysynda mańyzdy qujat týraly oqý ornynyń professor-oqytýshylary da súbeli oılaryn qosyp, paıymdy pikirlerimen bólisti.
Fılologııa ǵylymdarynyń doktory, professor Tynyshtyq Ermekova «Jańa Joldaý jáne rýhanı jańǵyrý: sabaqtastyq pen jańa múmkindikter» taqyrybynda baıandama jasap, jarqyn belesterge jeteleıtin strategııanyń basym baǵyttaryna tereńirek toqtaldy. Al, Pedagogıka-psıhologııa fakýltetiniń dekany, pedagogıka ǵylymdarynyń doktory, professor Saıra Jıenbaeva Elbasy Joldaýy mektepke deıingi tárbıeniń jańa baǵytta damýyna serpin beretindigi jaıynda áńgimeledi.
– Bizde qazirdiń ózinde olardy mektepke deıingi bilim berý isine tartý salasynda jaqsy nátıjeler bar. Mektepke deıingi bilim berýdegi memleket-jekemenshik seriktestiginiń úlgisi salmaǵyn arttyrdy. Jobada tórtinshi basymdyq – adamı kapıtal sapasyn jaqsartý dep mektepke deıingi bilim berýden bastaýdy basty nazarda bolýynda. Balalardy erte jastan mektepke deıingi tárbıemen jáne oqytýmen qamtýdyń qajettigin eskertedi. Osy jastaǵy balalardyń damýyndaǵy senzıtıvtik kezeńdigi, qazirgi balalardyń damýynyń óte qarqyndyǵy, qabyldaý beıimdiliginiń tezdigin eskerip, jetkinshekterdiń ózdigimen damýyna múmkindik jasaýdy, erkin damýyn qoldaıdy. Árbir jastyń bilim alýǵa, qorshaǵan ortany tanýǵa beıimin, ózdigimen damýyna, synı turǵydan oılaýyn damytýdy naq osy kezeńnen bastaý tıistigi meńzeıdi. Bizdi erekshe qýantatyny, oıy 3-6 jas aralyǵyndaǵy balalardy mektepke deıingi bilim berýmen 2020 jylǵa qaraı júz paıyz qamtý máselesin memleket pen bıznes birlese sheshýdi jalǵastyrý jalpyulttyq mindetterdiń biri dep kórsetedi. Halqynyń bolashaǵy búgingi óskeleń urpaq dep bilgen Elbasy saıasaty ómirsheń, jańa jaǵdaıda damýǵa múmkindik beretine senimimiz zor. Bul mindetterdi bıik jaýapkershilikpen oryndaý bizge júktelgen mártebeli mindet, – dep atap ótti S. Jıenbaeva.
Sondaı-aq, basqosý barysynda fılologııa ǵylymdarynyń doktory, professor Rýda Zaıkenova «Ulttyq mádenıetimiz ben ıdeologııamyzdy jetik meńgerý – rýhanı jańǵyrýdyń kepili», pedagogıka ǵylymdarynyń kandıdaty, professor Marııa Esenova «Adamı kapıtalyn damytý negizi – sapaly bilim berý», Jaratylystaný fakýltetiniń aǵa oqytýshysy Ádilhan Máýı «Jetinshi baǵyt. Adamı kapıtal – jańǵyrý negizi», pedagogıka ǵylymdarynyń kandıdaty Marııam Muqasheva «Bilim basty baǵdar» taqyryptarynda baıandamalar jasady.
Basqosýda sóz alǵandardyń paıymynsha, Memleket basshysy usynǵan elimizdi tórtinshi ónerkásiptik revolıýsııa jaǵdaıynda damytýǵa arnalǵan 10 negizgi mindet Qazaqstan damýynyń jańa baǵytyn kózdeıdi. Bul búgingideı almaǵaıyp ýaqytta qoǵamnyń múddesi men negizgi maqsatyn eskeretin strategııalyq turǵydan mańyzdy qujat.
