Taıaýda oblys ákimi Bolat Baqaýov Olgınka aýylyndaǵy Qytaıdan kelgen aǵaıyndarǵa jolyǵyp, olardyń ótinish-tilekterin óz aýyzdarynan tyńdap qaıtty. О́ńir basshysymen kezdesýden kóńilderinde bir qýanysh eskenniń áseri bolar, ondaǵy qandastarymyz bizge habarlasyp, alǵys aıtty. Jalpy, oblys basshylyǵy teriskeıdiń tósin toltyrýǵa baǵyt alǵan baýyrlardyń barlyǵynyń jaǵdaıymen tanysýǵa qulyqty ekenin jetkizgen bolatyn keleli jıynda. Al Olgınkaǵa barǵan óńir basshysy bizdiń keıipkerimiz Adal Hamıthan aǵamyzben de kezdesken eken. Ol Qytaıdan Olgınkaǵa deıingi 1,5 myń shaqyrym jerdi óziniń traktorymen júrip kelgen bolatyn. Aýyldan 2 mıllıon teńgege úı satyp alyp, 7 mıllıon teńgege jeke sharýashylyǵyn ashypty. Qazir basqa da qonys aýdarýshylar kvota alý maqsatynda qujattaryn resimdeýde.
Memleket basshysy da jýyrda BAQ ókilderimen kezdesýde «Uly kóshti bastadyq. Sodan beri bir mıllıon qandasymyz keldi. Olardan ósip jatqan urpaqtar odan da kóp. Uly kósh toqtaǵan joq. Eshqashan da toqtatpaımyz, eshkimge qarsylyǵymyz joq. Kelem degenderge esik ashyq», dedi. Shetelde áli 4 mıllıonnan astam qandasymyz bar ekenin aıtqan Elbasy olardy da jyly kóńilmen qabyldaýymyz kerektigin aıtyp ótti. «Ol jaqta jaǵdaılary jaqsy, qıynshylyq kórmese, tura bersin. Kelem degenderge kel deımiz. Bizdiń qaltaly azamattarǵa aıtarym, qandastyrymyzdy qabyldaýǵa jaqyn bolýymyz qajet. Qazir arnaıy qor quryldy. Sol qorǵa qol ushyn berýimiz kerek.
Jumysqa ornalasýǵa, baspana salýǵa az da bolsa kómek berýimiz kerek. Kvotany kóbeıtip jatyrmyz. Sondyqtan jýrnalıster de osy máseleni aıtyp otyrsa, qıynshylyq bolsa, bárimiz kómektesip otyrsaq, barlyq qandastarymyzǵa jaqsylyq jasaǵanymyz bolyp sanalady», dep atap kórsetken edi Elbasy. «Elge el qosylsa – qut». Olgınka ispetti bar aýylymyzda orta tolsyn, el qonsyn!
Farıda BYQAI,
«Egemen Qazaqstan»
Pavlodar oblysy,
Ýspen aýdany
