– Iá, qalaı, qart kommýnıst? Kapıtalızmniń jetistikteri tańdaı qaqtyrdy ma? – dedim kúlip.
Ákem jymıdy. Onyń da kóńilinde bir ázildiń tutana ketkeni sezildi. Biraq, ún qatpady. Sabyr saqtady. Bálkim, keıinge qaldyrdy.
Tek, tús kezinde ǵana eptep kóńili jadyrap:
– Sender bizdi kinálamańdar, – dedi maǵan. – Júıe – júıesimen, kıe – kıesimen jalǵasady. Biraq... ol kezde de jurttyń nan jep, jambas mújigenin umytpańdar. Biz sııaqty qara sharýa qaı kezde de eginin egip, malyn baǵyp júre bergen. Sodan basqa jazyǵymyz joq...
Bul, árıne, daýsyz shyndyq qoı.
* * *
Eki kúnnen soń ákemniń ishi pysyp, zerige bastady. Sebebi, munda ekeýmizden basqa qazaqsha sóıleıtin tiri jan joq. Qonaq úıdegi demalýshylardyń toqsan toǵyz paıyzy eýropalyqtar.
«Teń teńimen, tezek qabymen» degendeı, ákeme emin-erkin otyryp, emen-jarqyn áńgimelesetin ózi qatarly bir aqsaqal kerek-aq.
Keshkilik jaǵajaıda bir nemis shalmen «tildesip» kórmek bolyp edi. Onysynan túk shyqpady. Sebebi álgi shal «ymdy túsinbegen – dymdy túsinbeıdiniń» kerin keltirip, ákemizdiń qolyna, qımylyna qarap, yrjalaqtap kúle berdi.
Sonsoń teńiz jaǵasyndaǵy sákige kelip jaıǵasyp, aq bas tolqyndary terbetilip, aýnaqshyp jatqan kógildir aıdynnyń bir qıyryna qarap, uzaq oıǵa shomyp qaldy.
Jaǵajaıdaǵy altyn qumdy tabanymmen syzyp, ári-beri júrdim de, bir kezde qasyna qaıtyp oralyp:
– Ne oılap otyrsyz? – dep suradym.
– E-e, shyraǵym-aı, – dedi ákem aqyryn ǵana kúrsinip. – Teńiz de bizdiń dalamyz sııaqty keń eken ǵoı!..
Nurǵalı Oraz,
«Egemen Qazaqstan»
