Tańdaýdyń Pýshkınge birden túsýiniń kóregendikke qosa ónegelik sıpaty da ózgesheleý. Al «Qarańǵy túnde taý qalǵyp» qozǵalysynyń tiri beınesimen tildesip úlgertip, búkil álem úndestigine ún qosý aıdynyn ıelený mereıi alda ústemdik quryp kele jatty. Ulttyq tanym ereksheligin oqyǵan azamattarymyz kishipeıil jaratylysymen tap basyp tanyp qana qoımaı, qabyldaý aýqymynyń keńdiginen úmitin úzbesten aǵartýshylyq qyzmetti alǵaýsyz atqarǵan edi. Deı turǵanmen, orys qaýymy tarapynan izdenistiń osy qadamy elene qoımaıtyn sebebine kim úńilip kóripti. Eki ǵasyr boıyna óz atymen atalmaýdyń zııanyn zerttep, qanshalyqty zerdeleı aldyq degen suraqqa jaýabymyz mardymsyz ba dep qorqamyz. Qazaqty bilimdi el esebinde elestetý jaǵyna moıny jar bermeıtin burynǵy metropolııanyń tákappar astamshylyǵy aldynda kembaǵal sezinýden áli tolyq arylyp bolmaǵan sııaqtymyz.
Jıyrmasynshy ǵasyrdyń bastapqy kezine deıin buratana sanalyp kelgen eldiń edáýir bóligi «qara orysqa» aınalyp, qaǵynan jeringen qulannyń kerine uryný qaýpi de joq emesteı. Qanshyldyǵy tutanýǵa shaq qap turatyn perzentterimiz terrıtorııalyq tutastyqqa qarsy kóz alartyp, qasaqy sózderge qansha óre túregelse de, óz ýájderimen sanasatyndaı tıimdi tetikti áli taba almaı otyrǵany tutas ult bolyp alańdaıtyn qubylys emes pe. «Úı syrtynda kisi bar» degendi qazaq atamyz teginnen tegin eskertpegen. Qazaq jurtynyń alqaly jıyndarynda uıabuzar áńgimeniń sheti qyltıyp shyqsa bitti, qyby qana ilip ala jóneletini beseneden belgili.
El irgesin nyǵaıtyp, qataryn ulǵaıta bekitýdiń sharalaryna bir kisideı ún qosý qazaq balasynyń jalpy paryzy. Esesine aýyzdy qý shóppen súrtýdiń ıtjandy daǵdysynyń asqynǵan nobaıy áleýmettik jeliler arqyly atoılap kóringen kezde ózin-ózi ustaý mádenıetiniń osynshalyq tómendegenine sener-senbesińdi bilmeı daǵdaratynyń ras. Ult bolyp uıysý úderisine beıne bir adamnyń ǵana kesiri tıetindeı, qaıdaǵy joqty ańsap, áldekimdi pir tutý ólermendiginiń túpki syrynda aılaker aqyldan góri, aldanǵysh ańqaýlyq basym túsip jatatyndaı. Alypqashpa sózderge úıir minez ádiletke júginýdiń ornyna eki kúıdirmekke beıim turatynyna kóz jetkizgeli qashan.
«Jazýshy kúndeligi» toptamasynda Dostoevskıı orys ádebıetin Eýropaǵa aýdartyp, tanystyrý barysynda Týrgenovtiń «Rýdın» romanyn, Ostrovskııdiń pesalaryn atyn atap, túsin tústese de, kóńil kónshite qoımaıtynyn eptep qana sezdirip, qaryq qylyp qabyldaı almaıdy-aý degen qaýpin ashyqtan-ashyq bildiripti. Sodan uzamaı dúnıeni dúr silkindirgen orys kórkem oıynyń basynda sol Dostoevskııdiń ózi turǵan joq pa edi. Baıandaý ekpini men boıaý-reńkterine deıin halyqtyq nusqa endep kirgen erekshelikter arqyly jadyǵa berik ornyǵyp qalý sebebi de sol bolýy yqtımal-aý.
Bizde álemge tanylýǵa degen jappaı umtylys keıde kembaǵal sezinisterden áli kúnge arylyp bolmaǵanymyzdyń belgisindeı kórinetinin nesine jasyramyz. О́zimizde nazarǵa ilinip, aýyzǵa alynbasa da, shyǵarmalary dúnıeniń birqatar jetekshi tilderine aýdarylyp, kitaptary úzdiksiz basylyp shyǵaryla bastaǵan jazýshy bir erekshe jelpinistiń ústinde «Bul jóninen men Muqańnan da ozyp kettim-aý, shamasy» dep ańdamaı lebiz jaryp qoısa kerek. Ol kezdiń aǵa urpaǵynyń ókilderi mundaıdy keshire almaıtyn ustanymy myqty ma, álde Áýezovti pir tutý sezimi kirshiksiz taza ma, áıteýir sol paqyrǵa kóptiń nazasy tıgendeı kórinedi de turady. Al qazir zaman múlde basqa, ózińdi ashyqtan-ashyq qaıtalanbas tulǵa sanap, qasıetti arýaqtyń tolymyna shák keltirip, odan áldeneshe esege asyp ketkenińdi aıqaılap aıtýdyń esh sókettigi joq. Tolqymaly shaqtyń shalyǵy ústinde me, joq, qaradaı kóńiliń qalyp qulazyp otyrǵan sátte me, meıli qaısy bolsa da aıtyldy bitti, qazaq degen halyq tez qulaqtanyp alady. Biraz kún áńgime arqaýyna aınalyp, esimi el aýzynan túspeı, kúnderdiń kúninde bári sap basylady. Burynǵynyń kisileri sabyrǵa shaqyrǵan kezde «sen asyqqanyńmen, Qudaı asyqpaıdy» degen toqtamǵa eriksiz júgindiretin...
Jumabaı Shashtaıuly,
«Egemen Qazaqstan»
