Keńes áskeriniń Aýǵanstan aýmaǵynan shyǵarylǵanynyń 29 jyldyǵyna arnalǵan ekspozısııany qala turǵyndary, jaýynger-ınternasıonalıster, mektep oqýshylary jáne T.Bıgeldınov atyndaǵy áskerı mektep-ınternattyń kadetteri tamashalady.
Kórermender nazaryna 200-den astam jádiger usynyldy. Onyń ishinde fotosýretter, aýǵan soǵysy kezindegi áskerı kıim-keshekter, nagradalar men erekshelik belgileri boldy.
«Medaldiń syrt jaǵy» kórmesin bezendirý barysynda avtorlardyń kóp oılanýlaryna týra kelipti. Máselen, «Bul fotosýretterdi balalarǵa kórsetýge bola ma? Olar kórermender júreginde qorqynysh týdyrmaı ma?», degen suraqtar týyndaǵan. Oılana kele, uıymdastyrýshylar bolashaqta mundaı qatelikter qaıtalanbas úshin jas urpaq soǵystyń sýretterdegi qasiretti izin, jazylmas jarasyn óz kózimen kórýleri kerek degen toqtamǵa kelipti.
Fotograf Dáýlet Abdrahmanovtyń «Qyzyl iz» kórmesi jaýynger-ınternasıonalısterdiń qazirgi zamandaǵy portretter galereıasyn kórermen nazaryna usyndy. Ár sýrette eki kezeń ýaqyty shendestirile kórsetilgen – alysta qalǵan 80-shi jyldar jáne onyń aıasyndaǵy búgingi kún beınesi.
Atalǵan kórme jaýynger-ınternasıonalısterdiń erlik isteri men óz mindetterine degen adaldyqtaryn búgingi býyn ókilderine úlgi qylyp kórsetýdi maqsat etken.
Qaırat ÁBILDA,
«Egemen Qazaqstan»
