Uly Otan soǵysynyń qaınap jatqan 1941 jyldyń kúzinde Lenıngrad qalasy jaý qorshaýynda qalyp, halqy ashtyqtan qınalǵan shaqta bir eshelon (23 vagon) azyq-túlikti syıǵa tartqan qazaqstandyq delegasııanyń quramynda aq tarynyń atasy, gektarynan 201 sentner dán ósirip, álemdik rekord jasaǵan aqtóbelik Shyǵanaq Bersıev te bar bolatyn. Ozat aqsaqal qaıtarynda Máskeýde kidirip, oǵan jazýshy Sábıt Muqanov astananyń kórikti jerlerin aralatypty. Keshkisin sol kezde ataǵy jer jarǵan akademık Lysenkonyń úıinde meıman bolyp, elge bir jasap oralady. Keıinnen Ǵabıden Mustafın áıgili «Shyǵanaq» romanyn jazady.
Endi el nazaryna usynyp otyrǵan sýretimizdi sóıleter bolsaq, onyń basty keıipkeri biz aıtyp otyrǵan Aqtóbe oblysyndaǵy «Qurman» kolhozynyń Lenın ordendi tary ósirýshisi Sh.Bersıev pen kolhoz basshysy Sh.Rahmetjan.
Sol kezeńderde qazaq televızııasy da «Aq tary nege azaıyp ketti?», «Aq tarynyń atasy» habarlaryn jáne «Úsh báıterek» telepovesin jaryqqa shyǵaryp, Shyǵanaq shyńyn dáriptegen edi. Baǵdarlama barysynda dańqty dıqannyń eńbegi túbegeıli zerttelip, onyń is-tájirıbesi keńinen nasıhattaldy. 1943 jyly túsirilgen sýret televızııa muraǵatyna sol portrettik baǵdarlamany jurtshylyqqa jarııalap jatqan kezeńderde kelse kerek. Bıyl qazaq televızııasynyń 60 jyldyǵyna oraı ońtaıly sátte osy sýret oqyrman nazaryna jol tartsa dedik.
Qajy QORǴANULY,
ardager-jýrnalıst
