Qazaqstan halqy Assambleıasynyń qurylǵan kúnimen tuspa-tus keletin bul kúni men qatty tolǵanamyn. О́ıtkeni men qazaq halqynyń meıirimi men júrek jylýyn úsh jasymnan bastap kúni búginge deıin kórip kele jatqandardyń birimin. Qazaq jeriniń maǵan jattyǵy joq, alaıda, taǵylymy mol, kıeli de meıirimdi meken, qutty qonysym bolǵan Ońtústik Qazaqstan óńiriniń orny dara. О́tken jyly Elbasynyń «Bolashaqqa baǵdar: rýhanı jańǵyrý» baǵdarlamasyn júzege asyrý maqsatynda Ońtústik óńiriniń basshylary meniń aǵash besikte jatyp, kindik qanym tamǵan Qap taýynyń baýraıyndaǵy Havettiń topyraǵyn bastyryp, aýasyn jutyp, sýyn iship, ata-anamnyń izi qalǵan jerge barýyma múmkindik jasady. Bul meniń óńim túgil túsime enbegen, oıyma kelmegen tanymdyq ta tárbıelik máni bar, qoǵamdy kóriktendiretin jaqsylyq boldy. Bul sapar ótken aýyr kúnderden habardar etip, tarıhty tanytyp, sanaǵa sáýle túsirip, jan dúnıemdi tebirentti. Týǵan jerdi kórý degen meniń armanym bolmasa da, ata-anamnyń ózderimen birge ketken armandarynyń biri edi. Ońtústik óńirdiń azamattary sol ata-anama arman bolǵan dúnıeni baıandy baǵy órlegen maǵan buıyrtyp, arýaqty rıza etti. Kúlli jurttyń kóńilderine kún ornatqan oń jemisti is boldy. Alyptardy ómirge ákelgen kıeli Ońtústik óńiri zııalynyń keni, kúni kókte kúlimdep, shapaǵatty shýaǵyn tógip turatyn Turardaı tulǵany ómirge ákelgen, qut daryǵan, Qydyr qonǵan berekeli Túlkibasty maqtan tutamyn. Osy sapar barysynda Havettegi jartylaı tastan, jartylaı topyraqtan salynǵan úılerdi kórip kókiregim qan jylady. Jol boıy kúızelgen, kúńirengen el, kúrsingen dala, túnergen taýdy kórsem de ómir joly óte kúrdeli ári qaterli meniń sanamdaǵy qazaq degen jalǵyz uǵym júregimdi terbep, Qazaqstanǵa jer jetpeıtindigin, basqa jerdiń júregimdi terbetpeıtindigin uǵyndym. Otan ottan da ystyq, men úshin bir ǵana Otan, bir ǵana jurt bar ol qazaq jurty ekendigin, júregimde týǵan jerge emes, turǵan jerge degen mahabbattyń basym ekendigin sezindim. Aıaly janarynan adam balasyna degen jylylyq pen meıirim oty ushqyndaǵan qazaqty qadirlep, qasterleý adamı paryzymyz, azamattyq boryshymyz dep baǵalaımyn. Sonaý 1944 jylǵy qıyn-qystaý kezeńde Qazaqstannan jyly uıa taýyp, qazaqpen bas túıistirip jylǵa bolyp bastalǵan ómirimiz qazirgi kúni arnaly ózenge aınalyp, qazaq topyraǵynda tatý-tátti ómir súrip jatqan etnos ókilderiniń tiri qalǵandarynyń urpaǵy ózenniń saǵasyna aınalyp, tamyr tartyp, japyraq jaıyp baqytty ómir súrip keledi. Bul beıbitsúıgish memlekette teńdikte, birlikte bólinbeı, jarylmaı bir-birimizdi qoldap, táýelsizdigimizdi baıandy etýdiń jemisi.
Táýba, táýelsiz elim, sol eldiń Kóshbasshysy, máńgilik murattarǵa jetelep kele jatqan Nursultan Nazarbaevtaı Elbasymyz bar. Qazaq jurtyn búginde dúıim dúnıe tanıdy. Qaıda barsaq ta, Qazaqstan azamaty ekendigińdi maqtan tutasyń. Meniń týǵan jerime baryp, táý etip qaıtýym da osy táýelsizdigimizdiń arqasy, osy táýelsiz elde turyp jatqan halyqtardyń tatý-tátti ómiri men tirshiliginiń jemisi. Qazaqqa Jaratqan ıe bar ıgilikterdi óziniń peıili men nıetine qaraı bergen dep baǵalaımyn. Táýelsizdik alǵanymyzǵa jıyrma jeti jylǵa jýyqtady. Jer-Anamyzdyń baýyry bútin, elimizdiń irgesi tynysh. Myna qaýip-qaterli, syn saǵattary kóp ýaqytta tynyshtyqta ómir súrýdiń ózi zor baqyt. Osyndaı elge, onyń halqyna alǵys aıtpaý azamattyǵymyzǵa syn bolar edi. Alǵys aıtý kúni shyn máninde bizdi burynǵydan da jaqyndastyryp, bir-birimizge degen meıirimimizdi arttyra túseri haq. Men osy kúndi paıdalana otyryp, meni jalǵyzyndaı baýyryna basyp kele jatqan qazaq jurtyna perzenttik alǵysymdy aıtamyn. Meni Asyly Osman degen dárejege jetkizip, tórine shyǵaryp, tabanymnan syz, arqamnan jel ótkizbeı, mańdaıymnan sıpap kele jatqan osy qazaq jurty. Sondyqtan da men óle-ólgenshe qazaqqa qaryzdarmyn degen sózimnen jańylmaımyn. Qazaq – alysty jaqyndatyp, arazdy tatýlastyratyn, úlkendi syılaıtyn iltıpatty, kishige qamqor, adal, ańǵal halyq. Eshkimge tıispegen, al tıiskenge basyn ımegen batyr halyq. Bizdi osy kúnge jetkizgen qazaǵymnyń sol ór rýhy.
Qazaǵymnyń ulylarynan maǵan ulylyq buıyrmaǵanmen, ulaǵaty buıyrdy. Sol ulaǵatyn boıyma daryta otyryp, halim jetkenshe, qazaǵymnyń joǵyn joqtap, tilegin aqtap ótemin. Osy bir Alǵys aıtý kúni men Kókte Allaǵa, sol Alladan bir jas kishi qazaq halqyna, ony basqaryp otyrǵan qazaq dalasynyń samaly mańdaıyna, dámi tańdaıyna tıgen Elbasy, Tuńǵysh Prezıdentimiz Nursultan Nazarbaevqa, týǵan jerime baryp kelýime múmkindik jasap, jaqsylyqqa keneltken Ońtústik óńirdiń basshysy Janseıit Túımebaevqa, osy usynysty jasaǵan Túlkibas aýdanynyń ákimi Nurbol Turashbekovke, aýdan basshysynyń bir aýyz usynysyn qoldaǵan máslıhat depýttaryna, Qazaqstan Prezıdenti N.Nazarbaevtyń saıasatynyń beriktigin tanytyp, Grýzııany tańdandyryp, Ahysqany aralatyp, Borjomıde júrgen qazaǵymmen qaýyshtyrǵan «Aıǵaq» korporasııasynyń quryltaıshysy, qoǵamdyq keńes múshesi Dýlat Ábish baýyryma, onyń ujymyna halqymnyń aldynda bas ıip, raqmetimdi aıtyp, alǵysymdy bildiremin. Jurtym súrinbeı, jamandyqqa ilinbeı, jaqsylyq jandaryna serik bolsyn. Alla Arystyń aǵysyn, tulpardyń shabysyn bersin. Al men qaıda júrsem de bar kúshimdi Qazaqstannyń baǵy men baqyty, erki men erkindigi jolynda sarp etpekpin. Tirligimizdiń tiregi – tatýlyqty tý etip, tóbeme kóterip, qazaǵymnyń rýhyn bıiktetemin. Qazaǵymdy aıalaımyn anamdaı, arqasúıer panamdaı. Jasap, jańara ber 130 ult pen ulystyń urpaǵyn baýyryna basqan, azamattyq kelisimdi tuǵyr etip, túrli mádenıetter men dinderdi toǵystyryp, kóp ulttyń tatýlyǵyn tý etip otyrǵan zaıyrly memleketim – Qazaqstanym, Qazaǵym!
Asyly OSMAN,
Qazaqstannyń eńbek sińirgen qaıratkeri, qoǵam qaıratkeri, Qazaqstan halqy Assambleıasynyń múshesi
