Kóktem keler tusta taý bókterindegi qar erip, onyń sońynan tolassyz jaýǵan jaýyn saldarynan T.Rysqulov aýdanynyń Aqyrtóbe, Tereńózek jáne Mamaı aýyldaryna sý jaıyldy. Bul aımaqta qaýipti delinetin sý qoımalary men toǵandar bolmaǵanymen, taý irgesindegi aýyl halqynyń kóktem kelse alańdaıtyndaı jaǵdaıy bar. Ári etekte ornalasqan atalǵan aýyldar úshin taýdan túsken qar sýynyń úreı ákeletini anyq. Ásirese 27 aqpan kúni Tereńózek aýylyndaǵy tereń saıdyń arasymen eni 6, tereńdigi 2 metr sý aǵyp, jurtty ábigerge saldy. Abyroı bolǵanda eshqandaı úıge, adamdar men mal-janǵa zalal kelgen joq. Tek laı sýdyń betin basqa arnaǵa burý úshin aýylǵa kireberis jol arnaıy jyrtyldy. Budan soń Aqyrtóbe aýylynan Tereńózek aýylyna kirer tustaǵy kópirdiń de aldy qazylyp, sý jazyq dalaǵa aǵyzyldy.
Tereńózek aýylynda tasqyn oryn alǵan kúni Jambyl oblysy ákiminiń birinshi orynbasary Bekbolat Orynbekov oqıǵa ornyna arnaıy baryp, halyqpen kezdesti. Oblystyq jáne aýdandyq tótenshe jaǵdaılar departamentiniń basshylyǵy da sol aýylda. Oqıǵa ornyna baryp, Jambyl oblystyq tótenshe jaǵdaılar departamenti basshysynyń orynbasary Talǵat Sabırovpen tildeskenimizde, ol dál qazirgi ýaqytta halyqqa tónip turǵan eshqandaı qaýiptiń joq ekenin aıtty.
Onyń aıtýynsha, Aqyrtóbe, Tereńózek jáne Mamaı aýyldaryndaǵy 26 úıdiń aýlasyna sý kirgenmen, eshkimniń úı-jaıyna nuqsan kelmegen. Ári sol kúni oblys boıynsha 150 adam men 19 tehnıka jumyldyrylyp, tasqynnyń aldyn alǵan. Atap aıtqanda, turǵyn úılerdiń aýlasyna kirgen laı sýlardy soryp alý jumystary júrgizilip, sondaı-aq sý keletin dambylarǵa 350 qap qum tóselip, tehnıkalardyń kómegimen 1 mıllıon 980 myń lıtr laı sý egistik alqabyna qaraı burylǵan. Al T.Rysqulov aýdanynyń ákimi Asqar Qyryqbaev sý kelý qaýpi bar joǵarǵy arnalarda aýdannyń 8 tehnıkasy jumys istep jatqanyn, ári aýdan deńgeıinde shtab qurylyp, kezekshiler jumys isteýde ekenin aıtty. Sonymen qatar ákim eshqandaı otbasynyń zardap shekpegenin, sondyqtan da kómekke muqtaj azamattardyń joq ekenin málimdedi.
Aıta keteıik, taýly aımaqtarda erip, jurtty ábigerge salǵan qardyń qalyńdyǵy 70 santımetr bolsa, jerdiń tońy 55 santımetr bolypty. Bul oraıda erigen qar sýynyń jerge sińip ketý múmkindigi óte tómen. Dál osyndaı oqıǵa aýdanda 1967 jyly, odan keıin 2005 jyly oryn alǵan. On úsh jyldan beri bolmaǵan oqıǵa bıyl qystyń sońyn ala taǵy qaıtalandy.
Hamıt Esaman,
«Egemen Qazaqstan»
Jambyl oblysy
