Tas qamal bul qapastyń aty – jalǵan,
Qaraıyp, kúnniń kózin bulty shalǵan.
Kúl bolyp kórde jatyr júz Bahram,
Toı tarqap, júz Jámshıdtiń jurty qalǵan.
* * *
Qyzyq-aý: týǵan adam aqyr ólmek!
Tozǵasyn tarqatylyp jatyr órmek.
Tútinsiz jandy-aý taǵdyr órti ishinde,
Aq júrek talaı adal paqyr eńirep.
* * *
Taǵdyrdyń syry tereń, jete almaımyz,
Jumbaǵyn túgel taýyp kete almaımyz.
Kerýli kóz aldyńda sıqyr perde,
О́lemiz, biraq ári óte almaımyz.
* * *
Alady ajal jurtty talǵamastan,
Keıqýat, Jámshıdterden bar ma asqan?
Qul qylyp qý zamana qoıǵan bizdi
Uıqyǵa, aıla, arman sorǵa bastan.
* * *
Shirkin-aı, bir saıaǵa keler bolsaq!
Ushyǵyn uzaq joldyń kórer bolsaq!
Júz myń jyl ótkennen soń, o, darıǵa-aı,
Kógerip jerden qaıta óner bolsaq!
Aýdarǵan
Qýandyq Shańǵytbaev
