Qyzmette de, otbasynda da dıplomat

Negizinen dıplomatııa erlerdiń ju­mysy ekeni jıi aıtylady. Bul pikirmen keli­sesiz be?

2. Nelikten dıplomatııalyq qyz­met­ti tańdadyńyz?

3. Áıelderge tán qasıetterdiń dıplo­ma­­tııalyq qyzmette kómektesken kez­de­ri boldy ma?

4. Jaýapty qyzmet pen otbasyn qatar alyp júrý qıyn ba?

Raýshan ESBOLATOVA,
Qazaqstannyń Taıland Korol­di­gin­degi Tótenshe jáne ókiletti elshisi

1.Rasymen, dıplomatııa ǵasyrlar boıy erler mamandyǵynyń qataryna jat­qyzyldy. Degenmen, búginde dıp­lo­mat­tar qatarynda áıelderdiń sany artýda. My­saly, Nıý-Iorkte bas konsýl áıelder sany 27-ge jetti. Al Taılandta 12 elshi áıel akkredıttelgen. Meniń oıymsha, qa­zir­­gi tańda bul salany tek er azamattarǵa ǵana tán dep kesip aıtýǵa bolmaıdy.

2. Bul qyzmet arqyly Elbasy maǵan úlken senim artty dep oılaımyn. Sonymen qatar dıplomat óziniń kásibıligin, ıntel­le­ktýaldy kapıtalyn, áleýmettik baı­lanystaryn paıdalana otyryp Qazaq­stan­nyń damýy men el ıgiligi úshin óz Ota­nynan alys jerde jumys isteıdi. Bul da úlken jaýapkershilik júkteıtini anyq.

3. Meniń oıymsha, patrıotızm, eli­ne degen súıispenshilik, memlekettiń jetistikterin maqtan tutý adamnyń jynysyna táýeldi emes. Al dıplomat jumys barysynda kez kel­gen adammen til tabysýy kerek. Bul áıel adamdarǵa tán qasıetterdiń biri dep oılaı­myn. Sonymen qatar biz jergilikti áıelder qaý­ymymen tyǵyz qarym-qatynasta bo­la­myz. Bul da qyzmetimizge paıdasyn tı­gizbeı qoımaıdy.

4. Otbasy da dıplomatııaǵa negizdelgen ki­shigirim memleket ekeni sózsiz. Ulym me­niń jaýapty jumys isteıtinimdi tú­sinedi. Al men onymen ýaqyt ótkizý úshin ár múm­kindikti paıdalanýǵa tyrysamyn. Ta­­ńerteń 5-te turyp, tańǵy as ázirlep, mek­tep­ke shyǵaryp salamyn. Jumys qan­sha­lyqty mańyzdy bolǵanymen, otba­syn­daǵy tártipti saqtaýǵa, bala tárbıe­­sine ýaqyt bólý kerek.

Mádına JARBOSYNOVA,
EQYU Adam saýdasyna qarsy kúres jónin­degi arnaıy ókili jáne úıles­ti­rý­shisi

1.Shynynda da dıplomatııa er-aza­mattarǵa tán sala retinde moıyndalǵan. Men dıplomatııalyq qyz­metke endi kel­gende kóp jumys isteýge, kási­bı deń­geıde erlermen teń nemese keı­bir jer­lerde joǵary bolýǵa laıyq ekenim­di dáleldeýge májbúr boldym. Keıin Nıý-Iorkte «Kóp­tegen jetistikterge qol jetkize bilgen áıel­ge» degen jazýmen Álem­­dik eskertkish tań­bany aldym. Bul me­­ni jigerlendire tús­ti. Qazirgi tańda bul sala­­da áıelder er-aza­mattarymyzdan kem ju­­mys istemeıdi.

2. Men dıplomat bolýdy mektep qa­byr­ǵasynan bastap armandadym. Alaı­da, Qazaqstan táýelsizdikke qol jetkiz­gennen keıin ǵana armanym júzege asty.

3. Barlyq áıelderdiń boıynda bolatyn jaýapkershilik, jumysqa qabilettilik jáne jınaqylyq maǵan da tán qasıetterdiń biri. Sondaı-aq jumysymyzda áıeldiń beı­bitshilikti saqtaýǵa degen umtylysy da kóp kómegin tıgizedi. Qarsylasymdy sendirý úshin emosııaǵa júgingen kezim de az emes. Mysaly, BUU-nyń Bas hatshysy Kofı Annan 2002 jyldyń qazan aıyna Orta­lyq Azııa elderine saparyn jos­par­lady. Men ol kezde Qazaqstannyń BUU-daǵy Turaqty ókili edim. Sol kez­de Bas hatshynyń sapary Iraktaǵy jaǵ­daı­dyń nasharlaýyna baılanysty keıin­ge qaldyrylatyny habarlandy. Kofı Annan aýyzsha túsinikteme berý jáne mem­leket basshylaryna keshirim hattaryn jol­daý úshin Ortalyq Azııa elderi men Mońǵolııa elshilerin kez­desýge shaqyrdy. Jarty saǵatqa so­zylǵan kezdesýde er-azamattar bul sa­pardyń bolmaıtyny týra­ly habar­la­many jeńil qabyldady. Al men emosııalarymdy shekteı almadym. Kez­desýden keıin Kofı Annan sa­par­dyń keı­inge qaldyrylǵany týraly hat­­tardy tarat­pady. Úsh saǵattan keıin osy kabınettiń bas­tyǵy Ikbal Rıza tele­fon soǵyp, Bas hatshy saparǵa barý tý­ra­ly sheshim qabyldaǵanyn aıtty. Ol ma­ǵan: «Elshi hanym, emosıonaldy tur­ǵy­da sendire bildińiz, sebebi Bas hatshy al­ǵash ret halyqaralyq buqaralyq aqparat qu­raldaryna taratylǵan sheshimin joqqa shy­ǵardy», dedi. BUU Bas hatshysynyń Qazaqstanǵa alǵashqy sapary 2002 jyl­­ǵy 18 qazanda ótti. Osylaısha men Elba­synyń tapsyrmasyn oryndadym.

4.Otbasyń men jumysyńdy qatar alyp júrý syrt kózge ońaı kóringenimen, is júzinde birqatar qıyndyqtar bar. Biraq otbasynda da dıplomat bola bilý kerek. Áıel – otbasynyń uıytqysy bol­ǵan­dyq­tan, keıde óz múddelerińdi shek­teýge týra keledi.

Juldyz AQYShEVA,
BUU-nyń Ońtústik Afrıkadaǵy esir­t­ki jáne qylmys jónindegi basqar­ma­sy­nyń aımaqtyq ókili

1.Meniń oıymsha, dıplomatııa – gen­derlik belgige negizdelmegen kásibı sala. Ol basqa mamandyqtar sııaqty bilim, kásibı daıyndyq, tájirıbe men ıkemdilikti qajet etedi. Tabysqa qol jetkizý úshin jumysty úlken yntamen isteý kerek. Alaıda, kóp­tegen issaparlar men turaqsyz jumys kú­ni sııaqty erek­she­likterge baılanysty áıel­derde bir­qatar qıyndyq týyndaıdy. Ká­sibı tur­ǵy­da damý men otbasylyq min­det­terdi oryn­daýdy qatar alyp júrý ońaı emes.

2. Me­niń barlyq kásibı qyzmetim BUU-men tyǵyz baılanysty. Reseı Syrtqy is­ter mınıstrliginiń Dıplomatııalyq aka­de­mııa­synyń stýdenti bola otyryp, Reseıdiń Nıý-Iorktegi BUU janyndaǵy Turaqty ókildiginde taǵylymdamadan óttim, odan keıin Qazaqstannyń BUU janyndaǵy Turaqty ókilettiginiń dıplomaty retinde jumys atqardym. Qazaqstannyń Syrtqy ister mınıstrliginiń Ortalyq apparatyna qaıta oralyp, BUU men halyqaralyq uıym­dar basqarmasy basshysynyń laý­azymyna taǵaıyndaldym. 18 jyl boıy Birikken Ulttar Uıymynyń Esirtki jáne qylmys jónindegi basqarmasynda, alǵashynda Venadaǵy shtab-páterinde, qazir Ońtústik Afrıkadaǵy aımaqtyq keńsede jumys istep júrmin. Bir sózben aıtqanda, mamandyqqa kelgende tańdaý kóp bolǵan joq.

3. Qazirgi tańda arýlardyń boıynan shy­damdylyqty da, tabandylyqty da kó­rýge bolady. Bul qasıetter kez kelgen ju­mysta kómektesedi dep oılaımyn.

4. Otbasy men qyzmetti qatar alyp júrý óte qıyn. Jıi issaparlarǵa baılanys­ty ýaqytym tyǵyz, alaıda bos ýaqytymdy otbasymmen ótkizýge tyrysamyn. Keıde uly­ma úı tapsyrmasyn oryndaýǵa Skype arqyly kómektesýge týra keledi. Alaıda, mundaıda bos ýaqytty, otbasylyq qundy­lyq­tardy baǵalaı bastaısyń.

Daıyndaǵan

Gúlnur QÝANYShBEKQYZY,
«Egemen Qazaqstan»