Arýlardy sol mereıli mezgildiń alǵashqy aptasynda quttyqtaıtyndar az emes. Bizdiń tilek te sondaı izgi nıetti ózine maqsat tutqandaı. Jalpy, tabıǵattyń tamyryn búlkildetip turǵan qos bastaý, sulýlyqtyń sýaty – Ana bolsa, tirshiliktiń qýaty – Áke. Sol sulýlyqtan taraıtyn adamı uly moraldyq qasıetter, analyq meıirim, názik ıirim, bári-bári erte kóktemde búr atyp, búkil adamzattyń rýhanı bolmysyn túrli-tústi álemge boıaıdy. Bul rette kez kelgen anany shyǵarmańa shyraq qylýǵa bolatyndaı. Alaıda, batyr analardyń, batyr baptaıtyn besik ıeleriniń, sardarǵa sadaq tartýdy úıretken jaýynger hanymdardaı turpaty bólek názik jandylardyń jóni men joly bir basqa.
Bizdiń búgingi lepes sondaılyq tulǵa, respýblıkalyq Q.Muńaıtpasov atyndaǵy olımpıada rezerviniń mamandandyrylǵan mektep-ınternat-kolledjiniń ádiskeri, Qazaqstan Respýblıkasy bilim berý isiniń qurmetti qyzmetkeri Tatıana Chırkovaǵa arnalmaq.
Jalpy, Tatıana Nıkolaevna jaıly aıtpas buryn, áıeldik ádemi álemin joǵaltpaı-aq áskerı tártiptiń ádepki ádis-tásilin jetik meńgergen qyz-kelinshekterdiń qyzmetin aıta ketken jón. Eń aldymen atalǵan aýyr joldy tańdaǵan áıel zatynda minez bolý kerek shyǵar. Qaıtpas qaısarlyq, óshpes ójettik arýǵa eń asyl qarý bolsa kerek. Onyń ústine qazirgi tańda qyzmetiniń qyr-syryn jetik biletin saýatty mamandar az. Meńgergen mamandyqtan bólek, abzal isterimen, adamdyq hám analyq bolmysymen aıanbaı eńbek etý anaý-mynaý adamnyń qolynan kele bermesi de anyq. Muny nege aıtyp otyrmyz? Másele, temirdeı tártipti talap etetin, qyzdar túgili qylshyldaǵan jigitterdiń ózi baıqap-baıqap baratyn jumysqa bizdiń keıipker bir emes, eki túrli ómirbaıanymen baq synapty. Aıtalyq, Tatıana Nıkolaevna eń birinshi Pavlodar qalasyndaǵy pedagogıkalyq tehnıkýmdy, odan keıin pedınstıtýtty támamdaǵan soń óziniń eńbek jolyn Almaty qalasyndaǵy Baýyrjan Momyshuly atyndaǵy respýblıkalyq áskerı mektep ınternatynda bastaǵan. Keıin elordamyz Arqa tósinde boı kótergennen keıin general Saǵadat Nurmaǵambetov atyndaǵy «Jas ulan» mektebinde muǵalim bolyp qyzmet etedi. Tatıana hanym júrip ótken ustazdyq ulaǵatty joldardyń basqa baǵbandyqtan bási bir basqa bıik ekenin de osy jerde aıta ketken jón. Sebebi bolashaq el namysyn qorǵaıtyn batyrlardyń boıyna rýh, sanasyna bilim quıý basqa sıpattaǵy muǵalimdik. Eń alǵashqy eńbek jolynan bastap bala tárbıesimen aınalysyp kele jatqan izgilik ıesin bolashaq patrıottardyń baǵbany deýimiz sondyqtan shyǵar. Qyzmetine qyzý kirise ketetin, eńbek ete júrip óz áriptesterine syıly, bedeldi qyzmetker ataný da jemisti jol.
– Alǵashqy ýaqytta buryn maǵan tanys emes tártipke boı úıretý ońaı bomaǵany anyq, – deıdi bizdiń keıipkerimiz. – Alaıda, bul salada san qyrly tájirıbe jınadyq. Ony tek ózimizdiń ıgilikke ǵana paıdalanbaı, ol jigerdi bolashaqtyń boıyna sińirýge jumys istep kelemiz. Jýyrda ózimiz jumys isteıtin bilim ordasyna aýǵan soǵysynyń ardagerlerin qonaqqa shaqyryp, jas ulandardy kózi tiri qaharmandarmen júzdestirdik. Keıde menen suraıdy: áskerı mektepte jumys istep kelip, olımpıadalyq rezervke bala daıyndaý qıyndyq ákelmeı me dep? Onyń qaıta óz artyqshylyǵy bar der edik. Sebebi Otan namysyn qıyn kúnde qarýmen, beıbit kúnde bylǵary qolǵappen qorǵaý kerek. Mysaly, keshegi kúnniń bahadúrleri Qajymuqan Muńaıtpasov, Baýyrjan Momyshuly, Saǵadat Nurmaǵambetov bolsa, búginde ol dástúrdi Baqytjan Ertaev, Serik Sápıev jalǵap keledi. Biz solarǵa baǵban, baǵdarlaýshy bolsaq, ózimizdiń otan aldyndaǵy boryshymyzdy túgel ótegenimiz, – deıdi T.Chırkova.
Jalpy, patrıottyq tárbıe degenimiz tek Otanǵa degen jalań súıispenshilikpen emes, otbasyndaǵy úlgi-ónege men mektepten bastalatyn minsiz qyzmetke de baılanysty. Tatıana, endeshe sondaı ulaǵatty ustaz, bolashaq baǵbany der edik.
Mıras ASAN,
«Egemen Qazaqstan»
