О́ner mýzeıi men «Shyǵys Aqparat» medıaholdıngi birlese uıymdastyrǵan kórmege sanaly ǵumyryn oblystyq «Dıdar» gazetine arnaǵan fototilshiniń 60-tan astam sýreti qoıylypty. Shyǵystyń shyraıly tabıǵaty, kórkem kólderi, tákappar taýlary, shyń basynda asyr salǵan buǵy-maraldary, ańqyldaǵan adamdary... Áıgili Mustafa О́ztúriktiń О́skemenge kelgen sáti, Altaıdyń kerbuǵysy atanǵan ataqty jazýshy Oralhan Bókeı, qara sózdiń has sheberi Qalıhan Ysqaq, qaharman Qasym Qaısenov, abyz aqsaqal Boshaı Kitapbaev, «Dostarymdaı» týyndyny syılaǵan sazger Oralhan Kósherov... Shyǵys óńirindegi qazaq baspasóziniń qara shańyraǵy «Dıdar» gazetinde 60, 70, 80-jyldary qyzmet etken Turǵazy Nuqaı, Músilim Qumarbekov, Serik Ǵabdýllın, Keńes Iýsýpov syndy qalamgerler beınesi... Osynyń bári kórme tórinen oryn alypty.
Fotokórmege kelgen jurt dos-jarandary, áriptesteri men zamandastary Esaǵań dep erkeletken arda azamattyń qoltańbasy qalǵan aq-qara, túrli-tústi sýretterdi qyzyǵa tamashalady. Kórmeniń tusaýkeserinde oblystyq «Dıdar» gazetinde 20 jyldan astam bas redaktor bolǵan Jumádil Ádilbaev, fototilshiniń áriptesi Ǵylymbek Sábıtov, «Shyǵys Aqparat» JShS dırektory Irına Iаkýnına sóz alyp, E.Orynbaevtyń óz isiniń sheberi ǵana emes, otbasyna qamqor, joldastaryna adal azamat bolǵanyn tebirene eske aldy.
«Esaǵańmen 30 jylǵa jýyq birge jumys istedim. 90-jyldardyń ortasyna taman tehnıka damyp, fotoapparattyń jańa túrleri shyǵa bastaǵany belgili. Fototilshiler, ásirese ózge ult ókilderi sandyq fotoapparatpen jumys isteı bastady. Bizdiń Esimhan eski ádispen plenkaǵa túsirip, qaǵazǵa shyǵaryp júrdi. Ol qaǵazy bir kúni sarǵaıyp, bir kúni aǵaryp ketedi. Keı kúnderi «neshe kún júrip túsirgen sýretiń mynaý ma?» dep renjisip qalǵan kezderimiz de boldy. Sonda Esaǵańnyń: «Jurt qatarly fotoapparat alyp bere almaǵan redaksııalaryń qurysyn» degeni bar. Sol sózi qamshy boldy da, Almatydaǵy tanystarǵa aıtyp 4 myń dollar turatyn sandyq fotoapparat aldyryp berdik. Ol kezde bir «Nıvańyz» 3 myń dollar turatyn. Odan keıin bir jarym jyldan keıin «eskirdi» degen soń taǵy bir sandyq fotoapparat áperdik. Myna kórmedegi sýretterdiń kóbi sol fotoapparatpen túsirilgen bolatyn», – dedi Jumádil Ádilbaev.
Jer jánnaty Jetisý óńirinde dúnıege kelip, tór Altaıda máńgilik tynys tapqan fototilshini eske alý maqsatynda túsirilgen shaǵyn fılm de bul kúni jınalǵan jurtshylyqtyń nazaryna usynyldy. Fılmde Esaǵańnyń áriptesteri – jazýshy Jumaǵazy Igisin, oblystyq «Dıdar» gazetiniń bas redaktory Ýálıhan Toqpataev, ardager fototilshi Sergeı Sýrov óz estelikterin aıtypty. «Ol qol basyndaı fotoapparatymen qyzyqty, jaqsy dúnıelerdi qalt jibermeı, túsirip alyp, oǵan fılosofııalyq ár berip, túrlendirip, sony halyqtyń nazaryna usyndy. Esaǵań sońyna mol mura qaldyrdy. Búgingi kórme qas qaǵym sátte atqarǵan qyrýar jumystarynyń bir kórinisi» dep pikirin bildiripti J.Igisin.
Taǵylymdy sharanyń uıymdastyrylýyna uıytqy bolǵan belgili jýrnalıst, qalamger Aıtmuhambet Qasymov tusaýkeser sońynda kórmeniń ótýine kómek qolyn sozǵan «KazLider» holdınginiń bas dırektory Marat Muzaparov pen «KM kompanııalar tobynyń» prezıdenti Qaırat Mýsınge alǵysyn aıtyp, Esaǵańnyń ómirlik serigi Oraldy men balalaryn sahnaǵa shaqyryp, marqumnyń portreti men foto-albomyn syıǵa tartty. О́ner mýzeıindegi bul fotokórme bir aı boıy jurtshylyq nazaryna usynylatyn bolady.
Azamat QASYM,
«Egemen Qazaqstan»
О́SKEMEN
Sýretterdi túsirgen avtor
