Kásiporyn jumysshylary Temir men Muǵaljar aýdandary aýmaǵyndaǵy «Kókjeıde», «Qumsaı» jáne «Mártók» ken oryndarynda jumys isteıdi. Eńbek ujymynda 394 adam bar. Olardyń ishinde kelisimshart boıynsha shaqyrylǵan QHR-dyń bes azamatynan basqasy jergilikti turǵyndar.
О́tken jyly «KMK-Munaı» AQ áleýmettik mańyzdy jobalardy júzege asyrý isiniń nátıjeleri boıynsha Elbasy belgilegen «Paryz» syılyǵymen marapattalǵan. Sondaı-aq kásiporyn osy kezeńde kómirsýtegi shıkizat óndirý kólemin ósire kelip, 39 mıllıard teńge tabys taýypty. Budan jergilikti bıýdjetke 6 mıllıard teńgeden astam salyq tólemderi aýdarylǵan. Tipti kompanııa aımaqtaǵy áleýmettik nysandardyń ınfraqurylymyna qomaqty qarajat salý isinen de tartynyp qalmapty, onyń mólsheri 36 mıllıon teńgeden asyp túsedi.
«KMK-Munaı» AQ-tyń vıse-prezıdenti Samat Berdenovtiń aıtýyna qaraǵanda kásiporyn oblys ekonomıkasyna 10 mıllıard teńgege jýyq ınvestısııa quıýdy josparlaǵan. Kompanııa quramyndaǵy qyzmetkerlerdiń ortasha jalaqysy 170 myń teńge kóleminde. Onyń ındeksasııasy ótken jyly kásipshilik qyzmetkerler úshin on paıyz quraǵan. Árıne munyń bári kompanııa ujymynyń jaqsy jaǵy ekeni málim. Sonda onyń teris jaǵy qandaı? Tańǵalarlyq jaǵdaı – osyndaı tabysy mol kompanııa óz óndirisinde jergilikti úlesti kóbeıtýge múldem kóńil bólmeı otyrǵany. Taldaýlar men qolda bar naqty derekter kórsetip otyrǵandaı, onyń kólemi nebári segiz paıyz tóńireginde ǵana. Bul salystyryp aıtýǵa da turmaıtyn óte tómen kórsetkish ekeni belgili.
– Eger «KMK-Munaı» AQ-tyń tóńireginde shaǵyn jáne orta bıznesti qurý úshin tıisti jaǵdaılar týǵyzylmasa nemese olar standartqa sáıkes keletin taýarlar usyna almasa bul jaǵdaıǵa bir esepten túsinistikpen qaraýǵa da bolatyn shyǵar. Alaıda olaı emes ekeni ámbege aıan. Kerisinshe kompanııa aýmaǵynda mundaı áleýet pen múmkindik jetkilikti. Biz muny kórip otyrmyz, – deıdi oblys ákiminiń orynbasary Qaırat Bekenov.
Rasynda da atalǵan óndiristik kásiporyn jergilikti úlesti kóbeıtý isinen boılaryn nege aýlaq salyp otyr? Álde munyń ózi tek óz taýym bıik bolsyn deıtin áleýmettik astamshyldyq pa? Tabysy mol iri kompanııanyń tóńiregine shýaǵy men jylýyn túsirgeni jón emes pe?! Shyntýaıtyna kelgende «KMK-Munaı» AQ-tyń oń isteri jergilikti úlesti kóterý isine qyryn qaraýy arqyly jýylyp-shaıylyp ketkendeı áser qaldyrady.
Qazaqstandyq úlesti kóterý degenimiz óz elimizde óndiriletin munaı-gaz óndirisine qajetti qural-jabdyqtardy satyp alý jáne otandyq kásiporynda kórsetetin qyzmetterdi paıdalaný degen uǵymdy beredi. Budan boılaryn aýlaq salyp otyrǵan «KMK-Munaı» AQ basshylary óz is-áreketterin nemen aqtap alar eken?!
Temir Qusaıyn,
«Egemen Qazaqstan»
Aqtóbe oblysy
