Búginde aýyl turǵyndaryn jumyspen qamtý, shaǵyn bıznesti damytý maqsatynda júzege asyrylyp jatqan ıgi ister kóp. Kúni keshe aýqymdy áleýmettik jobalarǵa jol ashatyn «Prezıdenttiń bes áleýmettik bastamasynda» shaǵyn nesıe berýdi kóbeıtý, ásirese, aýyl-aımaqtar úshin, aýyldaǵy kásipkerlikti damytý úshin aıryqsha mańyzdy ekeni aıtyldy. Aýyldastarynyń alańsyz jumys isteýine septigin tıgizý qazyǵurttyq kásipkerdiń demeýshilik jasaýyna negiz bolǵan.
Sondaı-aq kásipker bul qadamyn Elbasynyń «Bolashaqqa baǵdar: rýhanı jańǵyrý» maqalasynda taıaý jyldardaǵy mindetter retinde aıqyndalǵan «Týǵan jer» baǵdarlamasymen baılanystyrady. Bul oraıda jergilikti qoǵamnyń máselelerin sheshýde azamattardyń, úkimettik emes uıymdar, mesenattar, bıznes ókilderi men memlekettik organdar kúshin biriktirýge baǵyttalǵan «Atameken» kishi baǵdarlamasy iske asyrylyp jatqany málim. Negizgi maqsaty árbir azamat óziniń týyp-ósken jerine, aýylyna kómek kórsetý, al negizgi baǵyty aýdandardaǵy ózekti máselelerdi anyqtaý, halyqtyq bastamalardy kóterý, sony birlesip sheshý bolyp tabylatyn baǵdarlama qazyǵurttyq kásipkerler tarapynan qoldaý tabýda. «Merýert ana» balabaqshasynyń ashylýy sonyń bir kórinisi.
Jalpy, Qazyǵurt aýdanynda 68 balabaqsha jumys isteıdi. Onyń 13-i memlekettik bolsa, 55-i memleket-jekemenshik áriptestigi aıasynda salynǵan. Balabaqshanyń ashylý saltanatynda aýdan ákimi Tólegen Telǵaraev búginde balalardy balabaqshamen qamtý deńgeıi 87,5 paıyzǵa jetkenin atap ótti. «Táýelsizdiktiń alǵashqy jyldarynda elimizde ekonomıkalyq qıyndyqtyń saldarynan kóptegen balabaqshalar óz jumystaryn toqtatyp, jekeshelenip basqa maqsattarǵa paıdalanǵan bolatyn. Sol ótpeli kezeńde elimizde búldirshinderge arnalǵan mekemelerge tapshylyq baıqalatyn. Osy oraıda Elbasy tapsyrmasy negizinde «Balapan» memlekettik baǵdarlamasy iske asty. Máselen, byltyr memleket-jekemenshik áriptestigi aıasynda «Balapan» baǵdarlamasymen 33 balabaqsha paıdalanýǵa berildi. Sondaı-aq «Týǵan jer», «Atameken» baǵdarlamalarynyń arqasynda aýdanymyzda jańa balabaqshalar sany ósip jatyr. Nátıjesinde balalardy balabaqshamen qamtý deńgeıin bıyl 90 paıyzdan asyrýdy kózdep otyrmyz. Sonymen qatar bizdiń aýdanda úsh aýysymdy mektepter máselesi de sheshilgen. Al apatty jaǵdaıda turǵan mektepterdiń máselesi bıyl tolyǵymen sheshiletin bolady. Kelesi kezekte yńǵaılastyrylǵan mektepterdi tıptik mektepke aýystyratyn bolamyz», dedi aýdan ákimi.
«Merýert ana» balabaqshasynda búldirshinder úshin barlyq jaǵdaı jasalǵan. Nysannyń jalpy aýmaǵy 0,45 gektardy quraıdy. Jergilikti 30 turǵyn turaqty jumyspen qamtyldy. Balabaqsha meńgerýshisi Adas Isaqulovanyń aıtýynsha, qyzmetkerlerdiń ortasha aılyq jalaqysy 40-60 myń teńge. Mekeme bóbekjaıǵa arnalǵan barlyq qural-jabdyqtarmen qamtylǵan. Sondaı-aq balalardy tasymaldaýǵa arnalǵan jaıly avtokólik te bar. Balabaqsha qyzmetkerleri balalarǵa sapaly bilim, sanaly tárbıe berýdi basty mindeti sanaıdy.
Ǵalymjan Elshibaı,
«Egemen Qazaqstan»
