Úndeýde aıtylǵan birinshi bastama – ár otbasyna baspana alýdyń jańa múmkindikterin berý bolsa, ótken jyly óńirde 18% ósimmen 833 myń sharshy metr turǵyn úı paıdalanýǵa berilip, 7 myń otbasy úıli boldy. Aǵymdaǵy jyly 916 myń sharshy metr turǵyn úıdi paıdalanýǵa berý josparlanýda. Qazirgi tańda oblysymyzda bir turǵynnyń baspanamen qamtylý kórsetkishi 23 sharshy metr.
– Elbasy atap ótkendeı, áli kúnge deıin óz baspanasy joq qanshama otbasy bar. Bul bizdiń óńir úshin de ózekti. Mysaly oblys boıynsha turǵyn úı kezeginde 18 myń adam tur, onyń kópshiligi Aqtaý qalasynda – 9 myń adam (50%), Jańaózen qalasynda – 4 myń adam (22%), Munaıly aýdanynda 3 myń adam (17%) kezekte. Halyqty baspanamen qamtý maqsatynda, turǵyndar úshin ıpotekalyq nesıeniń qoljetimdiligin qamtamasyz etetin «7 – 20 – 25» baǵdarlamasy qabyldanady. Baǵdarlamanyń tıimdi jáne sapaly iske asýyn qamtamasyz etý úshin ekinshi deńgeıli bankter, qurylys mekemeleri, shaǵyn jáne orta bıznes ókilderinen quralǵan jumys tobyn qurý kerek, – dedi oblys ákimi.
Ekinshi bastama – jalaqysy tómen jumysshylardyń eńbek-aqysyn kóbeıtý úshin olardyń salyqtyq júktemesin azaıtý baǵytynda Mańǵystaý oblysy boıynsha statıstıkalyq málimetterge sáıkes, turaqty jalaqysy bar 250 myń qyzmetkerlerdiń ishinde 22 myńnan astam adam tómen jalaqy alady. Bul bastama ózin ózi eńbekpen qamtyǵan turǵyndardyń áleýetin kóterýdiń taǵy bir joly ekendigi aıtyldy. Al úshinshi bastama – joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý.
Tórtinshi bastama – shaǵyn nesıe berýdi kóbeıtý boıynsha, Mańǵystaý oblysynda 2017 jyly 130 adamǵa 474 mln teńge kóleminde shaǵyn nesıe berilip, 219 jumys orny quryldy. Osy jylǵa bıýdjette 490 mln teńge qarastyryldy. Jaqynda respýblıkalyq bıýdjetti naqtylaý barysynda qosymsha taǵy da 1,5 mlrd teńge bólinetin bolady – barlyǵy shamamen 500 adam nesıe alady. Bul óz kezeginde, aýyldyq jerde kásipkerlikti damytýǵa mol múmkindik beredi.
Besinshi bastama – eldi gazben qamtamasyz etýdi jalǵastyrý máselesi Mańǵystaý óńiri úshin asa qıyndyq týdyrmaıdy. Qazirgi tańda oblystyń barlyq eldi mekeni tolyqtaı gazben qamtylǵan.
– Qazirgi tańda óńirimizde jańadan turǵyn úıler salynatyn jer telimderin gazben qamtý – kún tártibinde turǵan máselelerdiń biri. Bul jumystarǵa bıýdjet qarjysynan bólek «QazTransGazAımaq» kompanııasynan da qarjy tartylýda. Mysaly, kompanııa osy jyly oblysta quny 1,2 mlrd teńge bolatyn 9 jobany iske asyrady. Sonymen qatar Aqshuqyr, Saıyn Shapaǵatov, Munaıshy aýyldarynyń jańa jer telimderin, Aqtaý qalasynyń jańa shaǵyn aýdandaryn gazben qamtýǵa, «Jańaózen-Aqtaý» magıstraldy gaz qubyrynyń qurylysyna respýblıkalyq bıýdjetten qosymsha 3,5 mlrd teńge bólinetin bolady, – dedi bul týraly E.Toǵjanov.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
