Qoǵam ókilderi, óndiristik kásiporyndar basshylary, ardagerler jáne Qazaqstan halqy Assambleıasynyń músheleri qatysqan jıynda óńir basshysy Erlan Qoshanov ár bastamanyń qaraǵandylyqtardyń jaı-kúıiniń ońalýyna qalaı áser etetinin jiliktep aıtyp berdi.
Oblys basshysy «Ár otbasyna baspana alýdyń jańa múmkindikteri» bastamasy páter kezegin tómendetýge oń yqpalyn tıgizetinin erekshe atap ótti. Sonymen qatar Prezıdent bastamasynyń aldaǵy jyldary kezekte turǵan azamattar sanyn azaıtyp, oblystaǵy turǵyn úı qorynyń edáýir jańartylatynyna sebepker bolatynyn aıtty.
Oblys basshysy qala jáne aýdan ákimderiniń aldyna turǵyn úı qurylysyn belsendi damytý mindetin qoıdy. Aldaǵy ýaqytta turǵyn úı qurylysy alańdaryna ınjenerlik-kommýnıkasııalyq ınfraqurylymdardy jetkizý úshin jekemenshik qurylysshylarmen birigip, memleket-jekemenshik áriptestigi mehanızmi qoldanyla bastaıtynyn aıtty. Úndeýde kóterilgen basqa da mindetterdiń oryndalý barysy qatań baqylaýda bolatynyn jetkizdi.
Aktıv jınalysynda sondaı-aq oblysta stýdenttik jataqhanalardyń tapshylyǵy ótkir baıqalatyny áńgimege ózek boldy. О́ńir basshysy bul máseleni sheshýdiń joldaryn aıtyp berdi. Búgingi kúnde oblysta kúndizgi bólimde oqıtyn 25 myń stýdenttiń 13 myńnan astamy memlekettik grant boıynsha bilim alýda. Endi Elbasy bastamasynyń arqasynda olardyń sany 35-40 paıyzǵa artpaq.
Memlekettik granttardy úlestirý úshin qysqa merzim ishinde aımaqtyń qandaı bilikti kadrlarǵa muqtaj ekendigin anyqtaý óte mańyz beretin sharýa ekendigine toqtaldy oblys basshysy. Sonymen qatar stýdentterdi jatyn orynmen qamtamasyz etý de sheshimin tez tabýdy qajet etetin másele.
Osy oraıda E.Qoshanov JOO basshylaryn aldaǵy ýaqytta jobalaý-smetalyq qujattamalardy ázirlep, ınvestor izdestirý isimen shyndap aınalysýǵa shaqyrdy. О́ńir basshysy bul máseleniń erekshe baqylaýda bolatynyn da atap ótti.
Elbasynyń elimizdi ári qaraı kógildir otynmen qamtýdy jalǵastyrý bastamasy Qaraǵandy oblysynyń turǵyndary úshin de úlken mańyzǵa ıe. Joba aıasynda Qaraǵandy, Temirtaý, Jezqazǵan, Sátbaev, Saran jáne Shahtınsk sekildi oblystyń iri qalalary, sondaı-aq Abaı, Jańaarqa, Buqar jyraý, Osakarov, Shet, Ulytaý aýdandarynyń 120 eldi mekeni gazben qamtylatyn bolady.
Prezıdenttiń jańa bastamalaryn júzege asyrý jeke isin endi bastaǵan kásipkerler úshin bıznesin dóńgeletip alyp ketýge mol múmkindik beredi. Qaraǵandy oblysynda júzege asyrylǵan startap-jobalardyń sany eki esege ulǵaıýy da ábden múmkin.
– 2017 jyly jappaı kásipkerlikti damytý baǵdarlamasyn júzege asyrýdyń birinshi jylynda oblysymyzda isin jańa bastap kele jatqan 827 kásipker 4,5 mlrd teńge shaǵyn nesıeler aldy. Bul olarǵa aýyl sharýashylyǵynda jáne óńdeý óndirisinde jańa kásiporyndar ashýǵa, sondaı-aq 700-den astam jańa jumys oryndaryn qurýǵa múmkindik berdi, – dedi E.Qoshanov «Shaǵyn nesıe berýdi kóbeıtý» bastamasyna toqtala kele.
Alaıda bólingen qarajat barlyq nıet bildirýshilerge jeńildetilgen nesıe alýǵa jetkiliksiz boldy. Tek «Bastaý Bıznes» jobasy boıynsha ǵana oqýdan ótken 1313 kásipkerdiń 956-y qarjylyq resýrstardyń jetkiliksizdiginen shaǵyn nesıe ala almaı qalǵan. Osyndaı máseleniń týyndaýyna baılanysty, Elbasynyń aǵymdaǵy jyly bul baǵdarlama boıynsha qosymsha 20 mlrd teńge bólýdi tapsyrǵany belgili.
Aktıv jınalysynda oblys basshysy «Jalaqysy tómen jumysshylardyń eńbekaqysyn kóbeıtý bastamasy óńirdiń shamamen 160 myń turǵynyna qatysty bolatynyn aıta kelip, shyǵarylatyn qarajattyń shyn mánisinde jumyskerlerdiń jalaqysyn ulǵaıtýǵa baqyttalýyn qadaǵalaý kerektigine erekshe mán berdi.
– «Prezıdenttiń bes áleýmettik bastamasy» bizdiń oblystyń da ilgeri damýyna dem berip, ıgi yqpalyn tıgizedi, – dep qorytyndylady aktıv jınalysyn oblys ákimi.
Qaırat ÁBILDA,
«Egemen Qazaqstan»
QARAǴANDY
