Rasynda, kórshisiniń jaqsy bolýyn kim qalamaıdy deısiń? Bylaısha oılap qarasań, ómirińniń mándi de sándi ótýi bir jaǵynan kórshińe de tikeleı baılanysty. Kórshiń jaqsy bolsa, emin-erkin aralasyp, qýanysh-jubanyshtardy birge bólisesiń. Al kórshiń nashar bolsa, kóńiliń ornyqty bolmaı, bir nárse jetispegendeı elegizip otyrasyń. Qazaqtan sóz qalǵan ba, «Jaqsy kórshi – tóriń, jaman kórshi – kóriń», «Otty shuqysań óshedi, kórshini shuqysań kóshedi», «Kórshi aqysy – Qudaı haqysy» degen maqaldar bekerden-beker aıtylmaǵan. Olaı deıtinimiz, seniń búkil jaqsylyǵyń men kemshiligińdi eń aldymen kórshiń kórip-estıdi. Syılasa bilgen jaqsy kórshi qýanysh-qyzyqshylyǵyńmen bólisip, kemshilikter bola qalsa kórshi aqysy retinde tolyqtyryp otyrady.
Men ózim Sarysý aýdanynda 40 jyl eńbek etken kezimde, qyzmet babymen birneshe ret kóshýge týra keldi. Sońǵy turaqtanǵanymyz Saýdakent aýylyndaǵy M.Áýezov kóshesi boldy. Osy kóshe boıyndaǵy úıde 20 jyldaı turǵanda, kórshilermen óte tatý-tátti aralastyq. Barlyq merekelerdi, toı-dýmandardy birge ótkizetinbiz. Rasyn aıtý kerek, sol qýanyshtardyń, is-sharalardyń bastamashysy, uıytqysy bola bildik. Oǵan kórshilerimiz rızashylyǵyn bildirip jatatyn. Biz Taraz qalasyna qonys aýdararda kórshiniń balasy: «Biz endi kimmen aralasamyz?» dep qımastyqpen kózine jas alǵanda, meniń de kóńilim qatty bosap, tolqyp ketkenim áli esimde.
Máselen men ózim kórshilerge dán rızamyn. 2011 jyldan beri «Jansaıa» shaǵyn aýdanynda Táýke han kóshesindegi tórt qabatty úıde turamyz. Osyndaǵy 16 otbasy bir esikten kirip-shyǵamyz. Merekelerde bir-birimizdi quttyqtaý qalyptasqan jaıǵa aınalǵan. Naýryz meıramynda kórshiler shaqyrysyp, aıt kúnderi birigip aıttap, máre-sáre bolyp qalamyz. Náresteler dúnıege kelgende shildehana jasalyp, ıgi tilekterimizdi bildirip jatamyz. Úıdiń kireberisi kezekpenen jýylyp, tazartylyp turady. Esiktiń aldynda tal-daraqtar, gúlder jaıqalyp ósýde. Ony da kezektesip sýaryp, baptap otyramyz.
О́tken jyly kórshiler birigip, aýlaǵa keń dastarqan jaıyp, Naýryz meıramyn este qalarlyqtaı ótkizdik. Úsh baldyrǵannyń tusaýy kesildi. Balalar arasynda ulttyq oıyndar – asyq atý, qazaq kúresinen, sondaı-aq qysqa qashyqtyqqa júgirý, qol kúresinen jarys uıymdastyryldy. Bizdiń bul merekemizge Taraz qalalyq ardagerler keńesiniń basshylyǵy qatysty. Arnaıy kelgen «Qazaqstan-Taraz» telearnasy ótkizilgen is-sharany kópshilikke kórsetti.
Sondaı-aq Qurban aıt kúnderinde de birligi jarasqan kórshiler bir-birimizdiń úıimizde bolyp, quran baǵyshtap, izgi tilekter bildirip otyramyz. «Kórshiń qolaıly bolsa, qorań keń» degendeı, kórshilermen sol tatýlyqtyń arqasy bolar, bizde beısaýat júrgen adamdar kórinbeıdi, turǵan úıimizde tártipsizdik, keleńsiz kórinister beleń alǵan joq. Buǵan biz, turǵyndar tarapynan shúkirshilik etemiz.
Gazet betinde kóterilip otyrǵan mańyzdy máseleni jaýyp-jasyrmaı týrasyn aıtatyn bolsaq, bir-birimen tatý-tátti aralasyp turý, áýeli kórshilerdiń ózderine tikeleı baılanysty. Sol ortadaǵy jasy kelgen kisiler bolsa, úlkendigin bildirip, aýyzbirshilikke shaqyryp, bárin biriktirip júrse, qandaı ǵanıbet bolar edi!
Aldaberdi MAQAShEV,
eńbek ardageri
Taraz
