Forým barysynda aýdan kásipkerleri bıznestiń áleýmettik jaýapkershiligi aıasynda jalpy quny 124 mıllıon teńgeni quraıtyn yntymaqtastyq memorandýmyna qol qoıdy. Bir ǵana «Baqyrshyq» ken orny bul kúni memorandým aıasynda aýdannyń áleýmettik salasyna 89 mıllıon teńge qarjy bólýge daıyn ekendikterin jetkizdi. Jarma aýdanynyń ákimi Nurlan Sydyqovtyń aıtýynsha, óńirdegi kásiporyndar men kásipkerler tarapynan bólinetin qarjy bilim jáne densaýlyq saqtaý salasyna, eldi mekenderdiń ınfraqurylymyn jaqsartýǵa jumsalmaq. «Ekonomıkanyń qozǵaýshy kúshi – ınvestısııa. Byltyr aýdanymyzǵa 65 mıllıard teńge ınvestısııa quıyldy. Bul – oblys kóleminde О́skemen qalasynan keıingi kórsetkish. Investısııa quıýshylardyń deni – ken oryndary. Igerilmeı jatqan «Baqyrshyq» ken ornyna Reseıdiń «Polımetall» kombınaty aýqymdy ınvestısııa salyp, qurylys jumystaryn júrgizdi. «Bóke», «Aqjal» kenishterine de ınvestısııa salynyp, ken baıytý kombınaty boı kóterdi. Qazir Jarma aýdanynyń tórt jaǵynan jol qurylysy bastalyp jatyr. Oblysta balama qýat kózderine arnalǵan 6 joba bolsa, sonyń úsheýi – Jarma aýdanynda. Ispanııa kompanııasy aýdanymyzda 17 mıllıard teńge qarjyǵa kún elektr stansasyn salýdy josparlap otyr. Búgingi forýmǵa kelsek, mundaı forým jyl saıyn ótkiziledi. Bıyl memorandým aıasynda aýdanǵa bólinetin qarjy byltyrǵymen salystyrǵanda eki esege ulǵaıdy. Taǵy bir jaǵymdy jańalyq, bıyl «Baqyrshyq» ken orny iske qosylýǵa tıis. Bul aýdan, oblys emes, respýblıka kóleminde mańyzdy oqıǵa retinde qalary sózsiz», deıdi aýdan ákimi. Memorandýmǵa qol qoıylǵan saltanatty shara barysynda N.Sydyqov aýdannyń úzdik kásipkerlerin 9 atalym boıynsha marapattap, 100 myń teńgeniń sertıfıkattaryn tabys etti.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany
