«Biz banktermen, joǵary oqý oryndarymen, qurylys kompanııalarymen, Ulttyq bankpen, Qarjy jáne Ulttyq ekonomıka mınıstrligimen birneshe jınalys ótkizdik. Bárine yńǵaıly, túsinikti jáne ashyq mehanızmge kelip otyrmyz. JOO nemese qurylys kompanııasy, áleýmettik kásiptik kompanııa jer bolsa sol jerge, jer bolmasa ákimishilikten jer alyp ne bolmasa jer satyp alyp, eń aldymen jataqhananyń jobalyq-smetalyq qujattama jobasyn daıyndaýy qajet. Sol jobada qansha jatyn oryn salynatyndyǵy kórsetiledi. Odan keıin mınıstrliktiń Qarjy ortalyǵymen sol salynatyn oryndarǵa kelisim jasalady», - dedi mınıstr.
Onyń aıtýynsha, ýnıversıtet ne bolmasa qurylys kompanııasy jataqhana salatyn bolsa, onda ol paıdalanýǵa berilgen kúnnen bastap, belgili kezeń ishinde bir oryn úshin memlekettik aı saıyn sýbsıdııa tólenip otyrady.
«Qazirgi ýaqytta aldyn ala joba retinde bir jatyn orynǵa jyl saıyn ortasha 200 myń teńge kóleminde 8 jyl boıy memlekettik sýbsıdııa tóleýdi usynysyp otyrmyz. Eger osy qurylysty memlekettik bıýdjetten salsaq, 5 jyldyń ishinde 225 mlrd teńge jaratatyn bolamyz. Al usynylyp otyrǵan mehanızmge sáıkes memleketten tek qana 29 mlrd teńge ǵana jumsalady», - dedi Erlan Saǵadıev.
Mınıstrdiń aıtýynsha, endigi ýaqytta ýnıversıtet nemese qurylys kompanııasy joǵaryda atalǵan kelisim negizinde bankten kredıt alyp, qurylys kompanııasyn jaldap jataqhana salýǵa kirisýi qajet.
«Birinshiden, jataqhanalar qurylysyn «Damý» AQ-nyń «Nurly jer» baǵdarlamasyna engizý qajet. Sonda qarjylandyrý nesıeleri memlekettik prosenttik sýbsıdııalar alyp otyrady. Ekinshiden, ýnıversıtetterdiń, ásirese memlekettik ýnıversıtetterdiń qajetti jer ýchaskesi bar. Jer ýchaskesi joq ýnıversıtetterdi ákimdikter óz deńgeıinde qamtamasyz etý jáne bárine tıisti kommýnıkasııalar júrgizý boıynsha tapsyrma berýdi suraımyz», - dedi mınıstr Úkimet basshysy Baqytjan Saǵyntaevqa qarata.
