GAZ 63 avto kóligimen 4 er adam Amankeldi aýdanyndaǵy Rodnık aýylynyń jurtyna Arqalyq qalasynan túski 12.00-de shyǵyp ketken. Qańyrap bos qalǵan aýyldyń jurtynda et daıyndaıtyn fermerlik sharýashylyq bar eken. Ol shamamen Arqalyqtan 130 shaqyrym qashyqtyqta bolatyn. Adasqan adamdardyń týystarynan kómek suraǵan dabyl túsisimen Soltústik óńirlik aeromobıldi jedel-qutqarý jasaǵynyń Arqalyq qalalyq qutqarý bólimi Nıva Marsh Bronto kóligimen izdeýge attanady.
Rodnık aýylynyń jurtyna kelisimen anyqtalǵandaı, álgi jolaýshylar fermerlik sharýashylyqqa jete almaǵan. Qutqarýshylar sol jerdegi aınaladan joǵalǵan adamdardy izdestire bastady. Aýdannan shalǵaı jerde baılanys jelisiniń bolmaýy jáne 6 naýryzdan 7 naýryzǵa deıin soqqan boran izdeý jumystaryna edáýir kedergi keltirdi. Joǵalǵandardy tabýǵa kómektesetin izdi qar basyp qalǵan.
8 naýryz kúni saǵat 11 shamasynda qutqarýshylar ishinde eki adamy bar GAZ 63 avtokóligin izdep tapty, qalǵan ekeýi Rodnık aýylyna jaıaý bet alǵan. Anyqtalǵandaı kóz kórmeıtin dúleı borannyń saldarynan olar adasyp baǵytynan shamamen 30 shaqyrym jańylysqan. «Jyǵylǵanǵa – judyryq» degendeı, kólikteri de buzylyp qalypty. Olar kólikte túnep shyǵady, jaıaý tartqan eki adamdy qutqarýshylar aýylǵa bes shaqyrym qalǵanda taýyp alady. Kólik aýyldan 30 shaqyrym qashyqtyqta qalyp qoıǵan.
Barlyq zardap shekkender Arqalyq qalasyna jetkizildi. Qazir olardyń jaǵdaılary jaqsy.
Názıra JÁRIMBET,
«Egemen Qazaqstan»
Qostanaı
