Respýblıkalyq mańyzdaǵy tasjoldyń boıynda ornalasqandyqtan, qoǵamdyq kólikterdiń qatynasynda esh irkilis joq. Aýyldyq okrýgtiń ákimi Olga Azlerdiń aıtýynsha, Prezıdenttiń bes áleýmettik bastamasy birliktikter tarapynan úlken qoldaýǵa ıe bolyp, halyqtyń turmysy jan-jaqty qarastyrylǵan aldyńǵy sheshimderdiń zańdy jalǵasy retinde qabyldanǵan. 106 oqýshysy, 28 muǵalimi bar mektep úıinde Qazaqstan halqy Assambleıasynyń uıymdastyrýymen ótken respýblıkalyq biryńǵaı kúnge jınalǵandar arasynda jastardyń qarasy mol boldy. Elbasynyń halyqqa arnaǵan Úndeýin rızashylyqpen qabyl alǵandary júzderinen bilinip turdy.
– Memleket basshysy halyqtyń jaǵdaıyn jaqsartý jolynda qazaqstandyq sara joldy tańdap, ilkimdi ilgerileýdiń tyń joldaryn usyndy. Bul baǵdarlamada aýqymdy áleýmettik jobalardy júzege asyrýdyń tetikteri muqııat oılastyrylǵan. Jańa asýlarǵa jeteleıtin jarqyn beles ekeni birden anyq ańǵarylady, – deı kelip aýyl ákimi jerlesterin áleýmettik bastamalarǵa belsene qatysýǵa shaqyrdy.
Nına Eroshenko, Kúláı Aqpanova sekildi kelinshekterdiń iskerligine aýyldastary dán rıza. Bular jeke kásiptiń bilgirleri, uıytqylary sanalady. Bastapqyda ózin-ózi jumyspen qamtamasyz etýshilerdiń qatarynda bolsa, endi basqalarǵa da kómek qolyn sozyp otyr.
«Igilikti sharalardan ustazdar qaýymy da shet qalmaıdy. Árbir otbasyna baspana alýdyń múmkindikteri berilgenin qýana qostaımyn «Bizde «Dıplommen – aýylǵa!» baǵdarlamasy boıynsha eńbek etip jatqan muǵalimder az emes. Qatarymyz jastarmen tolyǵyp keledi. Olardyń «7 – 20 – 25» baǵdarlamasyna qosylyp, áleýmettik jaǵdaılaryn túzeýine tilektespin», dedi óz sózinde mektep dırektorynyń orynbasary Aınash Qabdósheva.
Alystaǵy aýyldaǵy jaqsy isterdiń qoldaýshylary men janashyrlarynyń oı-pikirleri bir arnada toǵysty.
О́mir ESQALI,
«Egemen Qazaqstan»
Soltústik Qazaqstan oblysy,
Ǵ.Músirepov aýdany
