Jas kelse iske

El táýelsizdiginiń on jyldyq merekesi qarsańynda Semeıde jastar teatry ashylǵan bolatyn. Al onyń qysqasha tarıhy tómendegideı. 1996 jyly osyndaǵy saz kolledjinde akterlik bólim ashylǵan bolatyn. Onyń ashylýyna Almaty­daǵy T.Júrgenov atyndaǵy óner akademııasynyń professory Darıǵa Turanqulova, dosent Maıra Omarbaeva men aǵa oqytýshy Meıramgúl Aleparova birden bir sebepker bolǵan-dy. Sol shaqta bul kisiler Semeıge qyzmet aýystyryp kele qalǵan. Cóıtip, 2001 jyly sol bólim túlekteriniń kúshimen munda «Darıǵa-aı» jastar teatry ashylǵan bolatyn. Sol shaqta teatr­dyń aıaǵynan qaz turyp ketýine onyń alǵashqy dırektory ári kórkemdik jetekshisi Aqparáli Aıtybaev kóp eńbek sińirdi. Alǵashqy jyldary qalalyq bıýdjetten qarjylan­dyryl­ǵan teatr búginde oblys qamqorlyǵyna alynǵan. Bıyl oblys ákimi tarapynan teatr ujymyna sý jańa avtokólik bólindi. Sonyń arqasynda oblystyń kóptegen aýdandarynda óner sa­parymen bolyp qaıttyq. Kórermender nazaryna el táýel­sizdiginiń jıyrma jyldyǵyna oraı belgili aqyn Nesipbek Aıtulynyń «Báıterek» dastany negizinde jazylǵan poe­tı­kalyq dramany jáne jeltoqsan qaharmany Qaırat Rysqul­bekov týraly «Yzǵarly jeltoqsan» jáne basqa týyndylardy usyndyq. Osy ótken on jylda teatrdyń qol jetkizgen jetistikteri barshylyq. Solaı deı turǵanmen, alar asýymyz áli de alda dep bilemiz. Joǵaryda aıtqanymyzdaı, qamqorlyqtan kende emespiz. Endi oblys, qala tarapynan jastar teatry úshin jeke ǵımarat izdestirilip jatyr. Sondaı-aq saz teatryndaǵy jabylyp qalǵan akterlik bólim qaıta ashylsa, nur ústine nur bolar edi. Bir sózben aıtqanda, táýelsizdik jemisi bolyp tabylatyn jastar teatry elimizdiń rýhanı ortalyqtarynyń biri bolyp sanalatyn Semeıdiń mádenı jaǵynan odan ári gúldene túsýine óz úlesin qosa beretindigine esh kúmán bolmasa kerek. Amangeldi BAQTINOV, «Darıǵa-aı» jastar teatrynyń dırektory. Semeı.