Elbasynyń bes áleýmettik bastamasyn júzege asyrýǵa baılanysty atqarylyp jatqan jumystar jaıyna arnalǵan kezekti baspasóz máslıhaty jataqhanalar salý máselesine arnalǵan bolatyn. Oǵan Bilim jáne ǵylym vıse-mınıstri Bıbigúl Asylova jáne «Qarjy ortalyǵy» AQ prezıdenti Asqar Ibraımov qatysty.
«Memleket basshysynyń halyqqa Joldaýynda jáne kúni keshe ǵana jarııalanǵan 5 áleýmettik bastamasynda Elbasy joǵary bilim sapasyn arttyrýǵa jáne stýdentterdiń baspana jaǵdaıyn jaqsartýǵa erekshe kóńil bólgen. Búgingi kúni eldegi JOO-larda bilim alatyn 530 myń stýdenttiń 204 myńy basqa qaladan kelgender. Bul barlyq stýdenttiń 38 paıyzy baspana máselesin sheshýdi qajet etetinin bildiredi. Qazirgi ýaqytta olardyń bir bóligi qarjylyq múmkindigine qaraı jaldamaly páterlerde turyp jatyr, qalǵan bóligi jataqhanalarǵa ornalastyrylǵan», dedi vıse-mınıstr B.Asylova.
Onyń aıtýynsha, bes áleýmettik bastama aıasynda bilim granttarynyń ulǵaıtylýy elimizdegi JOO-larda bilim alýshylar sanynyń artýyna, al bul óz kezeginde jataqhana oryndaryn da kóbeıtýge alyp keledi. «Sondyqtan Prezıdent 2022 jyldyń sońyna deıin stýdentter jataqhanasynda 75 myń jańa oryn qurýdy tapsyrdy. Mınıstrlik bul tapsyrmalardy oryndaý maqsatynda barlyq múddeli taraptarmen jınalys ótkizdi. Nátıjesinde qol jetken aldyn ala jospar jaıynda Bilim jáne ǵylym mınıstri Úkimet otyrysynda málimdegen bolatyn. Jalpylap aıtar bolsam, JOO nemese qurylys júrgizýshi mekeme jataqhana jobasyn daıyndap, olardyń biri «Qarjy ortalyǵy» AQ-pen kelisimshart jasaıdy. Oǵan sáıkes jataqhana paıdalanýǵa berilgen kúnnen bastap JOO nemese qurylys júrgizýshi mekeme belgili bir jyl boıy bir oryn úshin aı saıyn tólem alyp otyrady, ıaǵnı qurylysqa jumsalǵan shyǵyndar óteledi. Sodan soń kelisimshart negizinde JOO nemese qurylys júrgizýshi uıym bankten nesıe alyp, jataqhana salýǵa kirisedi», dedi B.Asylova. Aıtýynsha, stýdent jastardyń ómir súrý jaǵdaılaryn jaqsartý máselesin jekemenshik resýrstardyń, onyń ishinde joǵary oqý oryndarynyń, kolledjderdiń, ınvestorlar men basqa da seriktesterdiń resýrstary esebinen sheshý kózdelip otyr.
B.Asylova aıtyp ótkendeı, qazirgi kezde «Qazaqstan Respýblıkasynyń keıbir zańnamalyq aktilerine stýdent jastardyń ómir súrý jaǵdaılaryn jaqsartý, sonymen qatar jan basyna shaqqandaǵy normatıvtik qarjylandyrý máseleleri boıynsha ózgerister men tolyqtyrýlar engizý týraly» zań jobasy ázirlenip jatyr. Jaqynda ol múddeli memlekettik organdarmen kelisýge jiberiletin bolady.
Budan ózge, Bilim jáne ǵylym mınıstrligi jataqhanalar qurylysy jobalaryn arzandatý baǵytyn ustanyp otyr, sebebi búgingi tańda usynylǵan jobalardyń baǵasy birshama kóterińki.
«Aldyn ala jasalǵan esepteýler boıynsha jataqhanalar salýǵa shamamen 118 mlrd teńge bólinedi dep otyrmyz. Bul kezeń-kezeńimen, satylap beriletin qarajat. Kelesi jyly 100 mln teńge bólinse, 2022-2026 jyldary 15 mlrd teńgeden bólinetin bolady», dedi vıse-mınıstr. Onyń aıtýynsha, bul jataqhana salýdaǵy eń ońtaıly jospar. Al eger bul maqsatty qurylys bolsa, onda oǵan 118 mlrd teńge emes, 225 mlrd teńge bólý qajettiligi týyndaıtyn edi, deıdi ol. Sonymen qatar B.Asylova jataqhana salý úshin bankten nesıe alý stýdentterdiń oqý aqysyna esh áserin tıgizbeıtinin aıtty.
«Birinshiden, JOO nemese tapsyrys berýshi bankten nesıe alady, al memleket jaýapkershilikti óz moınyna alady. Sondyqtan jataqhana salǵannan, granttar sanynyń artqanynan oqý aqysy qymbattamaıdy», degen vıse-mınıstr stýdentterde tek burynǵydaı aı saıynǵy jataqhana qunyn tólep turý mindettemesi ǵana bolatynyn jetkizdi.
Dınara BITIK,
«Egemen Qazaqstan»
