«Aq Jaıyq» baspasynan jaryq kórgen aýdıokitapqa qalamgerdiń «Mona Lıza», «Sońǵy spektakl», «Qyr mozaıkalary», «Aına», «Jalǵyzdyq», «Aspandaǵy aq kóbelekter», «Altyn balyq» syndy shyǵarmalary engen.
Qazaq kórkemsóziniń tabıǵatyna tereń boılaǵan Rahymjan Otarbaevtyń «Aspandaǵy aq kóbelekterindegi» Dáýrenniń tıpi – bolashaqtyń beınesi. Oqyrmandy óz ózinen kóz jazyp qalmaýǵa úıretetin jumbaq tulǵa. Munda mazmunnan buryn keskin, keıip-kespir kórinedi. «Altyn balyq» áńgimesinde túrmelik tártipti buzǵan, qamalǵan sanadaǵy ómir – akvarıýmdaǵy altyn shabaqtyń Jaıyqtyń tolqynyna sekiretin tusyn kóremiz de oılanyp qalamyz.
Qazaqtyń qara sózin qıystyra otyryp túrli beınelerdi ómirge ákelgen jazýshynyń shyǵarmashylyq aıdyny búginde qazaq prozasynyń aıtarlyqtaı belesi bolyp qalyptasty. Qalamger oralymdy, yrǵaqty tilimen, aıshyqty boıaýlarymen oqyrmanyn beıjaı qaldyrmaıdy.
Dúnıeden ozǵanyna qyryq kún tolǵan jazýshynyń aýdıokitabynyń tusaýkeserine otbasy músheleri, qalamdas áriptesteri men oqyrmandar qaýym qatysty. Qytaı Halyq Respýblıkasynan jazýshy Akbar Májıt, Mońǵolııadan aqyn Suraǵan Rahmetuly kelip, qaıratker jazýshynyń qalamgerlik bolmysyna, shyǵarmashylyq álemine oı-pikir aıtyp, arnaý jyrlaryn oqydy. «Qytaıda álemniń úzdik jazýshylarynyń jaqsy kitaptary shyqsa, bir aı kóleminde aýdaryp, basyp jatady. Jyl saıyn myńdaǵan jazýshynyń shyǵarmalary mıllıondaǵan oqyrmannyń qolyna jetedi. Solardyń arasynda Rahymjan Otarbaevtyń da shyǵarmalary tárjimalanyp, oqyrmandar tarapynan óte jyly qabyldandy. Qazirgi zamandaǵy qazaq jazýshylarynyń ishinde Rahymjandaı óz oqyrmandaryn álemnen tapqan qalamgerler sırek» dedi jazýshy Akbar Májıt.
Jazýshy, Memlekettik syılyqtyń laýreaty Qajyǵalı Muqambetqalı júrgizgen jıynda oqyrman súıikti jazýshysyn taǵy bir ret esine alyp, qalamger shyǵarmalary óz júreginen óshpeıtinin taǵy bir márte pash etkendeı.
Baǵashar TURSYNBAIULY,
«Egemen Qazaqstan»
