Astananyń 20-jyldyǵyna oraılastyrylǵan saltanatty jıyn aıasynda oqý ornynyń «Aq shatyr» jazǵy alańyna jınalǵan kópshilik nazaryna ýnıversıtettiń óner ujymdary men jekeleı oryndaýshylary daıyndaǵan konserttik baǵdarlama usynyldy. Sonymen qatar, mýzykalyq-horeografııalyq etno-modern qoıylymyna Qazaqstannyń belgili óner tarlandary men sahna óneriniń jas talanttary da qatysty.
Olardyń qatarynda Sáken Maıǵazıev, Seken Turysbek, Gúlnar Sıqymbaeva, Ulbosyn Belǵozıeva, Kórkem Seısenbek, Sandýǵash Stamǵazıeva, Gúlshat Tákejanova, Aıgúl Qosanova syndy mádenıet maıtalmandary bar. Sondaı-aq, qazaq halqynyń ulttyq salt-dástúrlerinen syr shertetin mýzykamen árlengen teatrlandyrylǵan kórinis te mereke ajaryn aıshyqtaı tústi.
Sahna shymyldyǵy «Ular» folklorly-etnografııalyq ansambliniń oryndaýyndaǵy «Naýryz» ánimen ashyldy. Qyzdar Ýnıversıtetiniń rektory Gaýhar Aldambergenova jurtshylyqty ultymyzdyń ulyq merekesimen quttyqtap, bul meıram urpaqtar sabaqtastyǵynyń jəne halqymyzdyń tereńnen tamyr tartatyn salt-dəstúri men mədenıetiniń sımvolyna aınalǵanyn aıtty.
– Aıbyny asqaq Astananyń 20 jyldyq mereıtoıyna oraı kóziqaraqty kópshilik qaýym «ustazdar ustahanasy» dep at qoıyp, aıdar taqqan Qazaq memlekettik qyzdar pedagogıkalyq ýnıversıtetinde uıymdastyrylyp otyrǵan «áz-Naýryz – jańarý men jańǵyrýdyń bastaýy» atty merekelik jıynǵa qosh keldińizder! Naýryzdy ulyqtaý – halqymyzdyń salty men dástúrin jańǵyrtý dep bilemiz. Bul – Qazaqstan Respýblıkasynyń Prezıdenti – Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy ulttyq kodty saqtaýmen astasyp jatqan dúnıe. О́ıtkeni, ulttyq kod – rýhanı bolmystyń ózegi.
Biz búgin egemendiktiń ekinshi músheline aıaq bastyq. Bul aıshyqty kezeń elimizdiń ózindik dara jol tańdap, berik berekeniń belesine bettegenin dáleldep berdi. Árbir azamatyn baýyr eti balasyndaı baýyryna basqan Otanymyzdyń gúldenýine jol ashty. Halqymyzdyń atyn álemge áıgilep, mártebesin ósirdi. Barshańyzdy Ulystyń uly kúni – Naýryz meıramymen shyn júrekten quttyqtaı otyryp, jaqsylyqtyń jarshysy, jańa jyldyń bastaýy shańyraqtaryńyzǵa shattyq pen nesibe ákelsin! Denderińizge saýlyq, otbasylaryńyzǵa baq pen bereke tileımin, – dedi Gaýhar Tóremuratqyzy.
Sondaı-aq, merekelik sharaǵa arnaıy qonaq retinde qatysqan memleket jáne qoǵam qaıratkeri Shámshá Berkimbaeva, Almaty Management University rektory Gúlmıra Qorǵanbaeva, M. Áýezov atyndaǵy Qazaq memlekettik drama teatrynyń dırektory Ashat Maemırov, Jambyl atyndaǵy Qazaq memlekettik fılarmonııasynyń dırektory Dálel Ýásh Qyzdar Ýnıversıtetiniń ujymyn Naýryz meıramymen quttyqtady.
«Memleket bolashaǵynyń kilti – qazirgi jańa tehnologııalardy jete meńgergen, sonymen qatar túp-tamyrynan ajyramaǵan, salty men dástúrin, tarıhyn biletin bilimdi de bilikti azamattardyń qolynda. Osy oraıda Ulystyń uly kúni – naǵyz salt-dástúrimizdi dáripteıtin, ulttyq naqyshymyzdy nasıhattaıtyn óreli de, ónegesi mol meıram. Jyl basy qutty bolsyn,» – desti sóz alǵandar.
Merekelik is-sharanyń ekinshi bóliminde ýnıversıtet alańynda jalǵasyn tapty. Munda aqshańqan kıiz úıler tigilip, fakýltetter túbi bir túrki halyqtarynyń as mázirin daıyndap, ónerlerin kórsetip, ózara saıysqa tústi. Atap aıtqanda, Fızıka-matematıka fakýlteti qyrǵyz, Áleýmettik-gýmanıtarlyq fakýlteti ázirbaıjan, Jaratylystaný fakýlteti túrik, О́ner jáne mádenıet fakýlteti uıǵyr, Pedagogıka-psıhologııa fakýlteti túrkimen, Qazaq fılologııasy jáne álem tilderi fakýlteti tatar, Sharýashylyq basqarmasy qazaq jáne ýnıversıtet ákimshiligi ózbek ulttarynyń beınesinde halyqtardyń ózindik bederin somdady. Bir bul ǵana emes. Munda dekoratıvti-qoldanbaly shyǵarmashylyq kórme jəne ulttyq sport saıystary da uıymdastyryldy.
Qyzdar Ýnıversıtetindegi Ulystyń uly kúnin toılaýǵa Almaty qalasyndaǵy eńbektegen baladan eńkeıgen qartqa deıin keldi. Merekelik sharada stýdentter men qonaqtarǵa naýryzkóje jáne basqa da ulttyq taǵamdar taratyldy. Kıiz úı úlgisinde arnaıy daıyndalǵan sahnada Halyqaralyq jáne respýblıkalyq óner baıqaýlarynyń laýreaty «Tomırıs» bı ansambli, «Mýzart Life», «Aıgúl», «Voks akapella», «Arý» toptary, «Qyzdar» kvarteti jáne Kóńildi tapqyrlar komandasynyń qatysýymen ótken gala-konsert kópshiliktiń ystyq yqylasyna bólendi.
Osylaısha Naýryz meıramy taǵylym men tárbıeniń qarashańyraǵy Qyzdar Ýnıversıtetinde óziniń sán-saltanatymen jáne erekshe tartymdylyǵymen kópshilikti tánti etti.
