Alyp muhıt áldılegen Aýstralııa jerinde ótken álemdik doda qazaq boks tarıhyn dúnıejúzilik jylnamaǵa altyn áriptermen jazǵyzdy. Kókórim Bekzattyń jeńisi tarıhı oqıǵa boldy. Kútpegen syı deseńiz de bolady. Sol 2000 jyldary memlekettik jattyqtyrýshy bolǵan Serik Ábdenálıev aǵamyz «Bapkerler keńesi Ermahan, Muhtarhan jáne Bolat júldege talasady dep úmit artty. Al quramaǵa jańadan qosylǵan Bekzat Sattarhanov pen Oljas Orazalıev bir-eki jekpe-jek ótkizip, tájirıbe jınaqtasa bolady» dep sheshti» deıdi.
Aıtqandaı, Ibraıymov, Dildábekov jáne Jumadilov fınalǵa deıin tizgin tartqan joq. Olardyń qataryna qabyrǵadan at oınatyp Bekzat qosyldy.
Qalǵanyn jurt biledi. Myń jazyldy. Myń aıtyldy. Quıryqty juldyzdaı jarq etken Bekzat qapııada mynaý álemdi tárk etip tastap ketti. Bekzat kózi tirisinde «nege qazaq jigitterinen eki, úsh Olımpııa oıyndarynyń jeńimpazy joq. Bul belesten men ótemin. Qudaı buıyrtsa, men úsh dúrkin Olımpııa oıyndarynyń jeńimpazy bolamyn» dep birneshe ret suhbat berdi.
Kópshilik «munyń qalaı, artyq aıttyń-aý» degen joq. Ishteı tilektes bolǵanymen «Jas bala ǵoı áli. Bularǵa iri sóıleý jarasady. Olımpıadanyń altyndary jolda shashylyp jatqan joq» dep qoıatyn.
Rasynda, sheteldikter ónerine «fantastıka» dep tańdaı qaqqan Serik Qonaqbaevtyń ózi altyn ala almaǵan Olımpıadanyń joly qanshalyqty aýyr ekendigin dúıim jurt biledi.
Bekzattyń ákesi Seıilhan aǵamyzben jaqsy syılaspyz. Ár sózine jaýapkershilikpen qaraıtyn Bekzat jel sózdiń adamy emes edi. Úsh ret Olımp bıigin baǵyndyramyn degendi nege súıenip aıtty. Bir kezdeskende sonyń sebebin suradyq.
– Bekzattyń Olımpıadadan keıin ýaqyty bolmaı ketti. Jańaǵy oıyn biz de estip júrdik. Biz de ońashada ulymyzdan Sıdneıde «qaı jekpe-jek asa aýyr tıdi?» dep suradyq, – deıdi Seıilhan aǵa.
Shırek fınaldaǵy Ramaz Palıanımen ótkizgen jekpe-jegin aıtty.
– Áke, Ramaz Palıanı – Eýropanyń chempıony. Halyqaralyq jarystardan shappaı báıge alyp júrgen jigit. Jasy jıyrma jetiden asqan saqa boksshy. Qoldary balǵadaı. Eki-úsh taza soqqy ótkizip alǵanda baıqadym, tıgen jerin ýatyp jibere jazdaıdy. Shynymdy aıtsam, balańyzdyń shybyn janyn kózine kórsetti. Jyldamdyǵymnyń arqasynda ǵana shaldyrmaı kettim. Áke, sondaı boksshyny jeńgen sizdiń ulyńyz da jaı jigit emes qoı.
Al úsh dúrkin Olımpııa oıyndarynyń jeńimpazy týraly aıtqan sózime jaýap bereıin.
Sıdneıde meniń jasym jıyrmada boldy. Dene múshelerim áli tolyq jetilmegen. Otyzǵa jaqyndaǵan Ramazdyń bulshyq etteri bileýdeı, kúshi syımaı syrtqa uryp tur. Soqqylary tıgen zamatta opyryp jibere jazdaıdy. Al meniń bilegim onymen salystyrǵanda tym jińishke. Kóresiz, kelesi Olımpıada da meniń de bilegim, bulshyq etim tolady. Fızıkalyq jaǵynan myqty bolamyn. Alla bergen jyldamdyǵyma tolysqan kúshti qossańyz nege men úsh dúrkin jeńimpaz bola almaımyn. Men muny kókirek kergen maqtanysh, eldiń kóńilin aýdarý úshin aıtqan joqpyn. Kózim jetip tur. Oılanyp baryp aıttym, dedi. Ulynyń az ǵana ýaqytta tez eseıip, halyqtyń balasyna aınalyp úlgergenine súısingen Seıilhan áke paıymyna kóńili tolyp, qushaǵyna tartyp meıirlene mańdaıynan ıiskegen eken.
Alaıda armany asqaq uldy ajaldan arashalap qala almaǵanyna ishi ottaı janady. Bári de kúndizgideı kóz aldynda. 2001 jyldyń jańa kúnine sanaýly-aq saǵattar qalǵan. Túrkistan alańy. Bekzat Sattarhanov «Jyl adamy». Qaraqurym halyq. Sákeń bıik sahnada turǵan ulyna jete almaı júr. Jastar Bekzatty qorshap alǵan, qoltańba alýda. Sákeń sahna túbindegi basqyshqa jaqyndady. «Osy jerden kútip alamyn. Úıge alyp ketemin. Jańa jyldy birge toılaımyz. Endi bos júristi doǵar, boksqa oral dep aıtamyn», dep oılaǵan.
Bekzatty aqyry taba almady. Jurt aldyn bógeı bergen soń sahnanyń art jaǵynan sekirip ketipti. Baryp sheshesin, baýyrlaryn quttyqtaǵan. Shymkentke jol júrýi kerek. Dostary kútip otyr. Qoı-qoıǵa qaramaı shyǵyp ketken. Jelden júırik mashına synaptaı syrǵyp, juldyzdaı aǵyp keledi. Alystan Shymkenttiń ottary jymyńdaǵan. Taspa joldyń qoıanjondanǵan jerinde mashınanyń rýline ıe bola almaı qalypty...
Bozdaq Bekzat osylaısha búkil halyqty opyntyp ketti. Oıly jigit edi. «Úsh dúrkin Olımpııa oıyndarynyń jeńimpazy bolamyn» dep edi-aý. «El namysy – meniń namysym» dedi. Fınalǵa yrym kórip Ermahan aǵasynyń maıkasyn art jaǵynan bir býyp, kıip shyqqan bozbalanyń asqaq armandary oryndalmaı qaldy. Átteń, opasyz dúnıe...
Baqtııar TAIJAN,
«Egemen Qazaqstan»
