Aıtýly mádenı sharaǵa Qyzyljar óńirinen arnaıy delegasııa qatysqan bolatyn. Aqıyq aqynnyń 125 jyldyǵy qarsańynda túrik aǵaıyndar óleńderin jeke jınaq etip shyǵarsa, jýyrda «Kardesh Kalemler» kórkem ádebı jýrnalynyń bir sany ómiri men shyǵarmashylyǵyna arnalypty.
«Qazaqstan men Túrkııa–ejelden baýyrlas, taǵdyrlas elder. Eki taraptyń yntymaqtastyǵy rýhanı salada da bite qaınasyp keledi. Qazaqtyń kórnekti jazýshylary men aqyndaryn, zııaly qaýym ókilderin túrik jurtyna tanystyrý, muralaryn nasıhattaý berik dástúrge aınalǵan», dep jazady kirispe sózinde Eýrazııa jazýshylar qaýymdastyǵynyń tóraǵasy, «Bengý» baspasynyń dırektory Iаkýp Omaroǵly.
Jýrnalda el yqylasyna erekshe bólengen aqynnyń ár jyldary jazǵan óleńderi, pýblısıstıkalyq jazbalary, ózgeshe oı-tolǵamdary men alǵash usynylǵan qoljazbalary toptastyrylǵan. Halyqaralyq «TÚRKISOI» uıymynyń bas hatshysy Dúısen Qaseıinovtyń, Qazaqstannyń Túrkııadaǵy elshisi Abzal Saparbekovtyń, Gazı ýnıversıtetiniń rektory Ibrahım Ýslannyń, ǵalymdar Aıgúl Isimaqovanyń, Zarqyn Taıshybaıdyń, taǵy basqalarynyń júrekjardy baıandamalary engen. Halqy úshin basyn báıgege tikken Alash qaıratkeri jyrlarynyń túbi bir týystas elde óz oqyrmandaryn tabýy, keń aýqymda tanystyrylýy súıinishti jaıt, ult rýhanııatyna qosylǵan teńdessiz úles.Bir jaǵynan, úlgi-ónege alatyn tálim.
Budan buryn «Kardesh Kalemger» jýrnaly Súıinbaı, Jambyl, Qasym Amanjolov, Sherhan Murtaza, Oljas Súleımenov, Berdibek Soqpaqbaev sekildi qazaqtyń talantty tulǵalaryna birneshe sanyn arnaǵan bolatyn. Súıinbaı, Abaı, Jambyl, Táttimbet Qazanǵapuly, Dına Nurpeıisova, Maǵjandy ulyqtap, kóshelerge esimderiniń berilýi, eskertkishter ornatylýy, saıabaqtar ashylýy kóńilge erekshe jylylyq uıalatady.
О́mir Esqalı,
«Egemen Qazaqstan»
Soltústik Qazaqstan oblysy
