«Qazaqstan» Ortalyq konsert zaly sahnasynda tanymal ári óz elinde ǵana emes, álemge áıgili ázil janrynyń ártisteri jınalady.
Halyqaralyq ázil merekesine Reseı, Qytaı, Ýkraına, О́zbekstan, Armenııa, Qyrǵyzstan sııaqty memleketterden 30-ǵa jýyq tapsyrys tústi.
Festıvaldiń ereksheligi – qoıylymdardyń ázil, parodııa janrynda, mınıatıýra túrinde qazaq, orys jáne basqa da tilderde oryndalýynda. Dástúrge aınalǵan «Baýyrjan Fest» festıvaliniń eksklıýzıvti formaty óz kórermenin tabady dep senemiz. Halyqaralyq ázil merekesi ártúrli jastaǵy, ulty men dini bólek adamdardy, shyǵarmashylyǵy bir, ázilsúıgish jandardy bir shańyraq astyna jınaıdy.
Ázil festıvaline estrada juldyzdary Elena Vorobeı men Andreı Barınov, Vladımır Moıseenko men Vladımır Danıles, Karen Avanesıan men Obıd Asomov, Atyraýdan «Ara Atyraý», Shymkentten «Shanshar», Aqtóbeden «Eki ezý», Almatydan «Baýyrjan shoý», «Tamasha», «Dý-Dý» jáne «TTT» teatrlary ózderiniń jańa ázildik nómirlerimen qatysady.
II Halyqaralyq «Baýyrjan Fest» festıvaliniń jeńimpazdaryn marapattaý atalymdary Qazaqstannyń satıra janrynyń qurylýy men damýyna zor úles qosqan, qazaq ázil janrynyń maıtalmandary, «Tamasha» teatrynyń tarlandary, elimizdiń ázilkesh ártisteri, mádenıet qaıratkerleri, satıra jáne ázil janry mátinderiniń avtorlary, jazýshylar men aqyndar qurmetine arnalǵan.
Festıvalde «Ospanhan Áýbákirov atyndaǵy arnaıy júlde», «Sadyqbek Adambekov atyndaǵy «Tapqyrlyq» júldesi, «Shona Smahanuly atyndaǵy «Shoq tildi» júldesi, «Meıirman Nurekeev atyndaǵy úzdik ártistik jumys», «Ulyqpan Esenov atyndaǵy úzdik mýzykalyq nómir», «Marat Saqatov atyndaǵy úzdik ssenarıı», «Ýaıys Sultanǵazın atyndaǵy úzdik obraz», «Jarasqan Ábdirashev atyndaǵy úzdik monolog», «Toqsyn Qulybekov atyndaǵy kórermender kózaıymy», «Qudaıbergen Sultanbaev atyndaǵy «Úmit» júldesi» sekildi atalymdar boıynsha jeńimpazdar anyqtalady.
II halyqaralyq «Baýyrjan Fest» festıvali Qazaqstan halqynyń dostyǵy men birligi kúni jarqyn oqıǵaǵa aınalady dep senemiz.
Mereı Dildabaev
