Jazda sýper transfer jasamaqshy
Anglııanyń «Manchester Sıtı» klýby jaz mezgilindegi transfer maýsymynda shabýyl shebin TOP fýtbolshylarmen tolyqtyrmaq nıette.
Sheteldik basylymdardyń jazýynsha, «Manchester Sıtı» jazǵy maýsym-aralyq úziliste Harrı Keın («Tottenhem»), Mohammed Salah («Lıverpýl»), Neımar (PSJ) jáne Antýan Grızmann («Atletıko») sekildi sheber fýtbolshylardy satyp alýdy josparlaýda.
Fýtbolshylardyń baǵasyn anyqtaıtyn Transfermarkt saıtynyń málimeti boıynsha, Keın men Salahtyń narqy shamamen – 200, Neımardyń baǵasy 300 mln eýro. Al «Atletıko Madrıd» Grızman úshin 100 mln eýro surap otyr. Biraq fransııalyq fýtbolshy «Barselona» klýbymen kelisimge kelip, jazda katalonııalyqtardyń qataryna qosylýy múmkin ekeni aıtylýda.
Makgregordyń kezekti masqarasy
Jeńil salmaqtaǵy UFC chempıony ırlandııalyq Konor Makgregordyń dostarymen birge UFC 223 básekesiniń qatysýshylary otyrǵan avtobýsqa shabýyl jasaǵan áreketi áleýmettik jeliler men álemdik basylymdarda keńinen talqylanyp jatyr.
Vıdeodan kórgenimizdeı, Konor baspasóz máslıhatyna qatysyp, qonaq úıge ketip bara jatqan sportshylardyń avtobýsyna tas laqtyryp, kóliktiń terezesin syndyrǵan. UFC ókiliniń janyndaǵy dostary da tek turmaı, avtobýstyń ekinshi ánegin shaǵyp túsirgen.
UFC prezıdenti Dana Ýaıttyń aıtýynsha, jergilikti tártip saqshylary Makgregorǵa ázirshe memleketten syrtqa shyǵa almaıtynyn túsindirip, odan «qaraqshylyq» oqıǵasyn tezirek túsindirip berýdi talap etken. Sondaı-aq Ýaıttyń pikirinshe, eki salmaq boıynsha álemniń eks-chempıonynyń áreketi –UFC tarıhyndaǵy eń jaman oqıǵalardyń biri. «Bul UFC tarıhyndaǵy eń aýyr oqıǵa. Tártip saqshylaryna Makgregordy qamaýǵa alýǵa order berildi. Aıta keteý kerek, avtobýstyń ishinde reseılik Habıb Nýrmagomedov te bolǵan.
Eki mınýtta mıllıon dollar tapty
Basketboldan «Maıamı Hıt» klýby men Kanada quramasynyń shabýylshysy Kellı Olınık UBA turaqty chempıonaty aıasynda «Atlanty Hoks» komandasyna qarsy oıyn ótkizip, eki mınýttyń ishinde mıllıon dollar tabysqa keneldi.
Basketbolshy men klýb arasyndaǵy kelisimshartta Kellı Olınık bir maýsymda 1700 mınýt alańda oıyn ótkizetin bolsa, komanda basshylyǵy oǵan 1 mıllıon dollar kóleminde qarjylyq syıaqy beretini aıtylǵan. Bul jetistikke jetý úshin Olınıkke «Atlanty Hoks» klýbyna qarsy oıynda alańǵa nebári eki mınýtqa shyqsa jetkilikti edi. Bul kezdesýge deıin basketbolshy alańda 1698 mınýt oıyn ótkizgen bolatyn.
Kanadalyq shabýylshy atalǵan matchta 22 mınýt alańǵa shyǵyp, 19 upaı jınaǵan. Kezdesý qorytyndysy boıynsha «Hıts» qarsylastarynan 115:86 esebimen basym túsken.
Ronaldýdy jekpe-jegine shaqyrdy
Ekinshi jeńil salmaqtaǵy WBO belbeýi boıynsha álem chempıony, ýkraınalyq kásipqoı boksshy Vasılıı Lomachenkonyń menedjeri Egıs Klımas Krıshtıaný Ronaldýdy Vasılııdiń kelesi jekpe-jegine shaqyrǵanyn aıtty.
«Jýyrda Ronaldýmen jolyǵyp, ony jekpe-jekke arnaıy shaqyrdyq. Ol 12 mamyr kúni Nıý-Iork qalasyndaǵy «Madison Square Garden» sport kesheninde ótetin Lomachenko – Lınares aıqasyna kelýge ýáde berdi», deıdi Klımas. Aıta keteıik, buǵan deıin Lomachenko portýgalııalyq fýtbolshyǵa boks qolǵabyn syılaǵan edi.
Daıyndaǵan
Álı BITО́RE,
«Egemen Qazaqstan»
