Telekommýnıkasııa naryǵyna úlken ózgerister ákelgen sıfrlandyrý prosesi búgingi kúni álemniń kóptegen elinde júzege asyrylý ústinde. Sol kóshke qosylǵan Qazaqstan da qazirgi ýaqytta efırdi sıfrly teleradıo habar taratýǵa aýystyrý jumystaryn jolǵa qoıdy. Aqparat jáne kommýnıkasııalar mınıstrliginiń habarlaýynsha, bıyl jyldyń sońynda birqatar oblysta sıfrly habar taratýdy kezeń-kezeńimen engizý bastalady. Birinshi kezekte, týra alty aıdan soń Mańǵystaý oblysy kóshiriledi, al jeltoqsanda Jambyl jáne Ońtústik Qazaqstan oblystaryn sıfrlyq televızııamen tolyq qamtý josparalanýda.
Osynyń nátıjesinde habar taratýda kórinis pen dybystyń sapasy barynsha joǵarylap, efırdegi dybystyń tunyqtyǵy qamtamasyz etiledi. Buǵan qosa, joǵaryda aıtyp ótkenimizdeı, sıfrly júıe halyqqa oblys ortalyqtary men Astana jáne Almaty qalalarynda 30 otandyq telearnany, sondaı-aq aýyldyq eldi mekenderde 15 telearnany abonenttik ótemaqysyz, sapaly deńgeıde kórýge múmkindik beredi.
«Qalǵan óńirlerde bul júıeni engizý jumystary 2020 jyldyń sońyna deıin kezeń-kezeńimen júrgiziledi. Bul joba «Sıfrly Qazaqstan» memlekettik baǵdarlamasyn júzege asyrý boıynsha is-sharalar josparyna engizilgen. Onyń aıasynda 827 radıo jáne televızııa stansasyn salý jáne jańǵyrtý jumystary josparlanǵan», dep habarlady Aqparat jáne kommýnıkasııalar mınıstrligi.
Búgingi kúni 356 stansa salynsa, jyldyń sońyna deıin taǵy 292 stansa qurylysyn aıaqtaý josparlanýda, osy qadam halyqtyń 94%-yn sıfrly habar taralymymen qamtýǵa múmkindik bermek. Qalǵan 179 stansany 2019-2020 jyldary paıdalanýǵa berý josparlanýda. Aıta ketý kerek, sıfrly júıeni engizý barysynda analogtyq habar taratýdy toqtatý qatar júrgizilip, bul jumys jospar boıynsha 2021 jyly aıaqtalmaqshy.
Mamandar túptep kelgende, sıfrly habar taratýdy engizý aqparattyq ónimniń sapasyn arttyrýǵa ǵana emes, aqparattyq keńistikti bekemdeýge de úlken septigin tıgizetinin aıtady. Elimizdiń shekara mańyndaǵy birqatar eldi mekenderiniń kórshi elderdiń telearnasy men radıosyn tutynýǵa májbúr ekeni qoǵamda jıi aıtylyp júrgeni belgili. Sıfrly júıeni engizý osy máseleni sheshýge de yqpal etpek.
Qambar AHMET,
«Egemen Qazaqstan»
