Zań jobasynyń maqsaty bıznes-ortany jaqsartý men keńeıtý, kásipkerlerge ákimshilik kedergilerdi qysqartý jáne aýyrtpalyqty azaıtý aıasynda zańnamalyq bazany jetildirý bolyp tabylady.
Zań jobasy memlekettik baqylaý-qadaǵalaý qyzmetin reformalaýǵa, aqparattyq quraldardy retteýdi jáne retteýshi áserdi taldaý tetigin jetildirýge, tabıǵı monopolııa sýbektileri men kvazımemlekettik sektor kórsetetin mindetti qyzmetterdi reformalaýǵa, sondaı-aq básekege kedergi jasaıtyn normalardy alyp tastaýǵa baǵyttalǵan.
Odan basqa, zań jobasymen bıznes shyǵyndaryn jappaı tómendetý jáne «Doing Business» reıtınginde Qazaqstan jaǵdaıyn jaqsartý jónindegi sharalar kózdelip otyr.
Zań jobasymen birqatar zańnamalyq aktilerge ózgerister men tolyqtyrýlar engiziledi.
Sondaı-aq profılaktıkalyq baqylaýdy qamtıtyn memlekettik baqylaý men qadaǵalaýdyń jańa júıesi usynylady. Máselen, irikteý tártibimen júzege asyrylatyn tekserýlerdiń ornyna negizgi aıyrmashylyǵy ákimshilik is júrgizýdi qozǵamastan quqyq buzýshylyqtardyń profılaktıkasy men aldyn alý bolyp tabylatyn profılaktıkalyq baqylaýdyń jańa ınstıtýty engiziledi. Osyǵan baılanysty, Ákimshilik quqyq buzýshylyq týraly kodekske kórsetilgen fýnksııalarmen jáne ákimshilik is qozǵaý jónindegi ýákiletti organdardyń quzyretimen ushtastyrylǵan tıisti ózgerister engiziledi. Bul rette, sýbektige (obektige) barý arqyly profılaktıkalyq baqylaý men qadaǵalaý táýekelderdi baǵalaý negizinde júzege asyrylatyn bolady.
Zań jobasy aıasynda baqylaýdyń jıyrma salasy men birqatar baqylaý fýnksııalary qaıtalanýshy jáne tıimsiz retinde alynyp tastalady.
Sonymen qatar zań jobasymen jeke jáne zańdy tulǵalar úshin mindetti qyzmetterdi kórsetý jónindegi tabıǵı monopolııa sýbektileri men kvazımemlekettik kásiporyndardyń jumysyn retteý jónindegi erejeler engiziledi. Atap aıtqanda Úkimetke osyndaı kórsetiletin qyzmetterdiń tizbesin bekitý jónindegi, al ekonomıka salasyndaǵy ýákiletti organǵa olardy kórsetý tártibin aıqyndaý jónindegi quzyret beretin ereje kózdeldi.
Memlekettik retteý quraldaryn sapaly baǵalaý úshin zań jobasymen jergilikti deńgeıdegi jáne ortalyq memlekettik organdar vedomstvolarynyń barlyq sheshimderine retteýshi áserdi taldaý rásimin qoldaný, sondaı-aq bızneske áser etýdi baǵalaýdy kúsheıtý usynylady.
Qorshaǵan ortany qorǵaý jáne halyqtyń sanıtarııalyq-epıdemıologııalyq salaýattylyǵy salasynda tekserýlerdiń nátıjeleri týraly aktilerge shaǵym jasaý jónindegi apellıasııalyq komıssııa ınstıtýty engiziledi.
Zań jobasy Palatanyń qaraýyna jiberildi.
