«Prezıdenttiń bes áleýmettik bastamasyn» qoldaýdy kózdegen basqosýǵa óńirlerdegi Ardagerler keńesiniń basshylary, qoǵam qaıratkerleri men úkimettik emes uıymdardyń ókilderi qatysty. Jıyndy júrgizgen «Ardagerler uıymy» ortalyq keńesiniń tóraǵasy Baqtyqoja Izmuhambetov eń aldymen Elbasy Úndeýin qoldaǵan ardagerlerdiń hatyn oqydy.
«Bes áleýmettik bastama» – elimizge jańa serpin beretin aýqymdy qadam. Onda kóterilgen máseleler urpaǵymyzǵa jarqyn bolashaq, tynysh ómir syılaýǵa baǵyttalǵan. Prezıdent Úndeýi ardagerler tarapynan da qoldaý tabýda. Oǵan óńirlerdegi ardagerler keńesinen ortalyq keńes apparatyna kelip túsken hattar dálel», dedi B.Izmuhambetov.
Basqosýda sóz alǵan Shyǵys Qazaqstan oblysy Ardagerler keńesiniń tóraǵasy Aıtqazy Seıituly aqsaqaldardyń bastamasymen «Rýhanı jańǵyrý» baǵdarlamasy boıynsha óńirde jasalyp jatqan ıgi isterge toqtalyp, endigi mindet Úndeýge belsene ún qosý ekenin jetkizdi. «Biz ShQO ardagerleri Prezıdent bastamasyn Qazaqstannyń áleýmettik memleket retindegi konstıtýsııalyq normalaryn jańa mazmunmen baıytqan asa mańyzdy saıası qujat dep baǵalaımyz. Bul – barlyq qazaqstandyqtarǵa, sonyń ishinde el bolashaǵy jastarǵa qamqorlyq kórsetý jolyndaǵy naqty ister baǵdarlamasy», dedi ol.
«Ardagerler uıymy» ortalyq keńesi janynda memleket jáne qoǵam qaıratkerlerinen qurylǵan jumys toptary óńirlerde Prezıdenttiń «Rýhanı jańǵyrý» baǵdarlamasy men «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty halyqqa Joldaýyn el arasynda nasıhattap, óz tájirıbelerimen bólisip, belsendi túrde atsalysyp kele jatqanyn aıtqan Baqtyqoja Izmuhambetov «Bes áleýmettik bastamany» da túsindirý jumysy bastalǵanyn jetkizdi. «Ortalyq keńes apparatynyń uıymdastyrýymen barlyq oblystardaǵy belsendi ardagerler óńirlerdi aralap Prezıdenttiń bes áleýmettik bastamasyn túsindirý jumystaryn bastap ketti. Olar Úndeýge saı baspana alýdyń jańa múmkindikteri, jalaqysy tómen jumysshylardyń salyq júktemesin azaıtý, joǵary bilim alýdyń múmkindigi men sapasyn arttyrý, shaǵyn nesıe berýdi kóbeıtý, eldi gazben qamtamasyz etý máselelerin turǵyndarǵa jetkizýde», dedi Ardagerler uıymynyń basshysy.
Pleným sońynda «Ardagerler uıymynyń» «Prezıdenttiń bes áleýmettik bastamasyn» halyq arasynda túsindirý jumystaryn jalǵastyrý jáne Elbasy bastamasynyń tıimdi jáne tolyq júzege asyrylýyn qadaǵalaýǵa arnalǵan qaýlysy qabyldandy. Sondaı-aq aımaqtaǵy belsendi ardagerler arnaıy syılyqtarmen marapattaldy. Atap aıtqanda, Qyzylorda oblysy Qazaly aýdandyq ardagerler keńesiniń tóraǵasy Orazǵalı Bekbanovqa «Ardagerler uıymy» respýblıkalyq qoǵamdyq birlestigi ortalyq keńesiniń Qurmet kitabyna engizilgeni týraly kýálik tabystalsa, ortalyq keńestiń turaqty komıssııasynyń tóraǵasy, general-maıor Marat Naǵmanovqa «Qurmet» tósbelgisi berildi. Pavlodar oblystyq ardagerler keńesiniń tóralqa múshesi Kenje Keńesbaev, ortalyq keńes tóralqasynyń múshesi, ǵylym doktory Beket Turǵaraev «Qurmet» gramotasymen marapattaldy. Osy sııaqty óńirdegi 126 aqsaqal arnaıy syılyqtarǵa ıe boldy.
Maıgúl SULTAN,
«Egemen Qazaqstan»
Sýretti túsirgen Baqytjan Teńizbaev
