Qazaqstan halqy Assambleıasynyń kezekti jıynyna qatysý úshin elordaǵa arnaıy kelgen qalamger oqyrmandarmen óziniń ómir joly, shyǵarmashylyq izdenisterine qatysty súbeli suhbat júrgizip, týǵan jerine degen júrekjardy saǵynyshyn jetkizdi.
«Búgin, mine, týǵan ólkem – Qazaqstan jerine kelip, sizdermen kezdesip, pikirlesip otyrǵanyma óte qýanyshtymyn. Men Qarataý qalasynda týǵanymmen, negizgi jumysym Máskeýde bolǵandyqtan, qazir sol jaqtamyn. Biraq týǵan elimmen aradaǵy baılanysty eshqashan úzgen emespin. Únemi rýhanı shyǵarmashylyq baılanystamyz. Búgingi kezdesý de osy oıymnyń aıqyn aıǵaǵy. Jalpy, fantastıka janryndaǵy ádebıet oqyrman úshin óte qyzyqty dep sanaımyn. Sondyqtan da bul janr bolashaqqa ózgeshe oı júgirtip, basqa álemge kóz tikkisi keletin jastardy únemi ózine úıirip áketerine senemin», deıdi jazýshynyń ózi.
Jambyl oblysynda ómirge kelip, shyǵarmashylyq jolyn Almaty qalasynan bastaǵan Sergeı Lýkıanenkonyń kitaptary 1980-1990 jyldary aralyǵynda shyǵa bastady. «Narýshenıe» atty alǵashqy ǵylymı-fantastıkalyq hıkaıasy «Zarıa» jýrnalynda jarııalanyp, sol kezde-aq oqyrmannyń úlken qyzyǵýshylyǵyn oıatqan bolatyn. Búginde «Aelıta», «Zvıozdnyı most», «EuroCon», «Platınovyı Tarlan», «Corine» premııalarynyń laýreaty atanyp úlgergen fantast qalamgerdiń qııaly álemdi sharlap ketkeni qashan. Onyń kitap betterindegi tereń oıy men ushqyr qııaly oqýshysyn eshqashan beıjaı qaldyrmaıdy. Kerisinshe, tek qana qııal qarmaıtyn ǵajaıyp álemniń tylsymyna jetelep, árdaıym oqyrmanyna ǵalamat áser syılaý muratynan bir sát te aınyǵan emes.
Jazýshy eńbegi tek kitaphana sórelerinde ǵana emes, búginde kınoteatrlar ekranyna shyǵyp, qym-qýyt sıýjetke qurylǵan shytyrmanǵa toly oqıǵalar kórýshisin de umytylmas áserge bólep júr. Áıgili kınorejısser Tımýr Bekmambetovtiń shyǵarmashylyq jumysyna arqaý bolǵan Sergeı Lýkıanenkonyń «Dozor» týyndysy sondaı shyǵarmalar qatarynan.
Qazirgi tańda esimi Reseı shekarasy emes, álemdik oqyrmandarǵa jaqsy tanys shyǵarmashylyq ıesiniń taǵylymdy áńgimesin tyńdaýǵa jınalǵan meımandar arasynda elimizge belgili jazýshylar, jýrnalıster, QHA músheleri, etnomádenı birlestikterdiń, ǵylymı jáne shyǵarmashylyq zııaly qaýymynyń ókilderi, stýdentter jáne taǵy basqa qonaqtar bar.
Kezdesýde jazý ónerindegi izdenisteri jaıly jan-jaqty syr qozǵaǵan qalamger óziniń «Chernovık» atty áńgimesi boıynsha túsirilgen osy attas kórkem fılminiń premeraaldy treılerimen kópshilik qaýymdy tanystyryp, jaqynda álemdik kınoprokatka shyǵýy josparlanǵan kórkem shyǵarma jaıly áserimen bólisip, fılmniń túsirilý barysyndaǵy qyzyqty jaıttaryn da áńgimeledi. Sondaı-aq jazýshy shyǵarmashylyq júzdesýde óziniń kásiptik qyzmeti men shyǵarmashylyq izdenisterine qatysty qoıylǵan suraqtarǵa jaýap berdi.
Nazerke JUMABAI,
«Egemen Qazaqstan»
