Birde mynadaı oqıǵa bolypty. Kórshisiniń baıandy tirligine qyzǵanǵan beıbaq ony «urlyq jasaıdy, alaıaqtyqpen paıda tabady» dep jalǵan ósek taratady. Bul sóz ýaqyt ótken saıyn isinip-kúbinip qazıdyń qulaǵyna jetedi. Qazı-sot shabarmandaryn jiberip «urlyqshy» ataǵan azamatty abaqtyǵa japtyryp, tergep-tekseredi.
«Aqqa – qudaı jaq» degendeı jalaly jigittiń eshqandaı jazyqty emesi dáleldenip, qazı-sot mán-jaıdy bilmekke ósek-sóz taratqan adamdy shaqyrtady. Ol kisi qazıdyń qaharynan qorqyp, ótirik-ǵaıbat aıtqanyn moıyndap, keshirim suraıdy.
Qazı kúnáharǵa bir paraq aq qaǵaz ustatyp, osyǵan ana jigit jaıly aıtqan ósek-ǵaıbatyńnyń birin qaldyrmaı jaz dep buıyrady. Anaý jipke tizgendeı, táptishtep jazyp shyǵady.
– Jazyp boldyń ba?
– Boldym.
– Onda, – deıdi qazı qolyńdaǵy qaǵazdy kúldeı etip usaqtap týra da, úıińe bara jatqan jolda attyń ústinde turyp mań dalaǵa ushyryp jiber. Osyny oryndaǵan soń erteń qaıta kel! Saǵan qandaı jaza qoldaný kerektigi osy oqıǵadan keıin sheshiledi.
Qazıdyń tapsyrmasyn múltiksiz oryndaǵan ǵaıbatshy erteńinde alyp-ushyp jetedi. «Kúldeı etip týralǵan qaǵazdy jelge ushyryp jiberdim taqsyr!». Onyń durys bolǵan eken, – degen qazı: «Keshegi ushyrǵan qaǵazdyń qıqymdaryn túgel taýyp bárin jınap ákel de, bir-birine qosyp jazbany qaıtalap oqyp shyq!» dep buıyrady. «Olaı jasaı almasań jazaǵa tartylasyń!».
Kúnáhar qatty sasady. «Taqsyreke, jelge ushqan qaǵazdyń qıqymyn qalaı jınaımyn?». Qazı aıtady: – Sen beıbaq, ósek aıtpaı turyp oılanýyń kerek edi, taratqan sóziń qaǵazdyń qıqymdary sııaqty kúlli álemge shashylyp ketti, men keshirgenmen báribir jaıylǵan ósekti qaıta jınaı almaıtynyńdy uqtyń ba?
«Aýyzdan shyqqan sóz – atylǵan oq» degen osy. Uńǵydan ushqan oqty qaıtara almaıtynymyz sııaqty, aýyzdan shyqqan sóz de qaıta kirmeıdi. Sózge abaı bolaıyq aǵaıyn!
Beken QAIRATULY,
«Egemen Qazaqstan»
