«Rýhanı jańǵyrý» baǵdarlamasynyń aıasynda, mundaı aýqymda alǵash ret uıymdastyrylyp otyrǵan jyr merekesine óz elimizden bólek, Reseı men Mońǵolııadan, Qyrǵyzstan men Qaraqalpaqstannan ádeıilep kelgen jyrshylar men jyraýlar qatysty. Mereke shymyldyǵy Qaraǵandy oblystyq S.Seıfýllın atyndaǵy qazaq drama teatrynyń ártisteri ázirlegen sahnalyq kórinispen ashyldy.
О́nersúıer qaýym elimizge tanymal Almas Almatov, Erbolat Shaldybekov, Baıanǵalı Álimjanov, Maıra Sársenbaeva, Marat Súgirbaı, Bıdas Rústembekov, Farhat Orazov, Demeýbaı Jolymbetov, Shattyq Ýatqan, Qazybek Ádikeı, Armat Islamǵalıev, Amandyq Kómekov syndy jyrshylardyń ónerine kýá boldy.
Basqa elderden kelgen Aıdyn Qurmanovtyń (Reseı), Aıperi Qulbaevanyń (Qyrǵyzstan), Rınat Tájibaevtyń (Qaraqalpaqstan), Avırmed Baldandorjdyń (Mońǵolııa) oryndaýyndaǵy jyrlar da kópshilikti ózindik órnekterimen, erekshe áýezimen baýrap aldy.
Festıvaldiń alǵashqy kúninde ónerpazdar oblystyń Buqar jyraý aýdanynda bolyp, uly jyraýdyń eskertkishine taǵzym etti. Aýdan ortalyǵy Botaqara kentiniń mádenıet úıinde jergilikti halyqqa konsert qoıdy.
Al ekinshi kúni Qaraǵandy qalasyndaǵy Stanıslavskıı atyndaǵy drama teatrynda kópshilik jyraýlar saıysyn tamashalady. Ásem ónerdi ár qıyrda dáriptep júrgen jyrshylardyń ónerine tánti bolǵan Arqa jurty bir serpilip qaldy.
Festıval aıasynda sonymen qatar Táttimbet atyndaǵy ult aspaptary akademııalyq orkestri, Q.Baıjanov atyndaǵy konserttik birlestik jáne halyqaralyq baıqaýlardyń laýreaty N.Temirbekov óner kórsetti.
Festıval qorytyndysyna barlyq qatysýshylarǵa aqshalaı sertıfıkattar tabys etildi.
Qaırat ÁBILDA,
«Egemen Qazaqstan»
Qaraǵandy oblysy
