Búgin keshke Oral qalasynda eki úlken konsert qatar ótpek. Onyń birinshisi – «Astanadan aq tilek» konsertinde Astana Memlekettik akademııalyq fılarmonııasy ujymdary – «Saryarqa» halyq mýzykasy ansambli, estradalyq bı, «Shalqyma» bı ansamblderi, sondaı-aq klassıkalyq jáne estradalyq vokal solısteri óner kórsetse, ekinshi «Uly dala áýenderi» atty konsertte Ǵ. Jubanova atyndaǵy memlekettik ishekti aspaptar kvarteti Oral qalasynyń turǵyndaryna keremet kesh syılaıdy. Bul baǵdarlama aıasynda Shýberttiń, Gaıdnnyń, Brodınniń, Jubanovtyń, Jaıymovtyń, Táttimbet pen Qurmanǵazynyń shyǵarmalary oryndalady.
18 mamyr kúni «Nur Otan» partııasy ǵımaratynda ótetin «Elordadan elge sálem» gala-konsertine elordalyq fılarmonııa ujymdary qatysady. Sahna tórinde Rınat Malsagov, Klara Tólenbaeva syndy estrada juldyzdary, «Art-Dombyra» trıosy óz ónerin ortaǵa salady.
19 mamyrda osy zalda Kórkem Sholoshova óziniń «Qyz qııaly» atty jeke bı baǵdarlamasyn mýzykalyq tartý retinde oraldyqtar nazaryna usynady. Úsh kúnniń ishinde A.N.Ostrovskıı atyndaǵy Oral drama teatrynyń sahnasynda M.Gorkıı atyndaǵy MAODT artısteri óz qoıylymdaryn kórsetedi. «Repertýar eresekterdi de, balalardy da qýantady» deıdi uıymdastyrýshylar.
Astananyń mádenıet kúnderi ótetin úsh kún boıy Hadısha Bókeeva atyndaǵy Batys Qazaqstan oblystyq qazaq drama teatrynyń foıesinde «Aq tilekpen, Astana» atty beıneleý óneri kórmesi jumys isteıdi. Ekspozısııaǵa otandyq sýretshilerdiń 100-den asa týyndysy qoıylǵan.
Qazbek QUTTYMURATULY
«Egemen Qazaqstan»
Batys Qazaqstan
