Kórmeni tamashalap bolǵannan keıin, kópshilik Ánýar Boranbaevty eske alý keshine jınaldy. Oǵan akterdiń týǵan-týysy, aýyldastary, jary Aqbópe keldi. Estelikter aıtyldy. Olar Ánýardyń talantymen qosa, qarapaıymdylyǵyn, adamgershiligin kóbirek eske aldy. Synyptasy Haırolla Hasenov, týysy Tarǵyn Ábenovtiń, inisi Qanat Boranbaevtyń, jary Aqbópe Boranbaevanyń, taǵy basqalardyń áserli estelikterin kópshilik yntamen tyńdady.
– Balalyq shaǵymyz birge ótti. Ol kezde mektepti bitirgenderdiń bar armany oqýǵa túsý úshin Almatyǵa barý bolatyn. Áke-sheshemiz úshin oqýdyń eń kúshtisi agronomdyq, ekonomıstik, zootehnık, mal dárigeri sekildi mamandyq alatyn oqýlar edi. Kópshiligimiz agronom, mehanık, zootehnık bolamyz dep Almatydaǵy ınstıtýttarǵa tústik. Ánýar da úlkenderdiń qalaýymen Aýyl sharýashylyǵy ınstıtýtynyń Agronomııa fakýltetine túsken bolatyn. Biraq ony alǵashqy kýrstardan tastap ketti de, júrek qalaýymen óner jolyn qýdy. Ol aýylda júrgende ádebıetten myqty bolatyn, – deıdi synyptasy Haırolla aǵaı.
– Ánýar aýylyn, týǵan jerin óte jaqsy kóretin. Aýylǵa baryp, Ánýardyń izi qalǵan topyraqty basyp kele jatyrmyz. Ánýardyń barlyq rolderi kóz aldymda. Abaıdy, Syrymdy, taǵy basqa kóptegen rolderdi qalaı oınaǵany kórermenniń esinde. Kınodaǵy eńbekteri óz aldyna bir tóbe. Ol tegin emes, tekti adam edi. О́mirde, úıde de óte jaqsy adam edi. Maǵan degen yqylasyn qalaı umytýǵa bolady? Árıne Ánýarmen birge ótken ýaqytymdy naǵyz baqytty kezderim dep bilemin. Ánýardaı jigitke jar bolý bar áıeldiń armany ekeni ras. Átteń, qaıteıin, taǵdyr kóp kórdi, kópke uzatpaı alyp ketti. Osy keshti uıymdastyrǵan aýdandyq, oblystyq kitaphana ujymdaryna, aýdan basshylyǵyna úlken rahmetimdi aıtamyn, – dedi Aqbópe Boranbaeva.
Keshte Ánýar Boranbaev týraly derekti fılm kórsetildi.
Názıra Járimbet,
«Egemen Qazaqstan»
Qostanaı
