Bas hatshynyń Sırııa boıynsha arnaıy elshisi Staffan de Mıstýra Qaýipsizdik keńesiniń múshelerine 14-15 mamyrda Astanada ótken sırııaaralyq kelissózderdiń toǵyzynshy kezeńine qatysqany týraly aıtty.
BUU-nyń arnaıy elshisi joǵary deńgeıdegi 9-shy Astana májilisi aıasyndaǵy deeskalasııa máselesine, ásirese Idlıb máselesine qatysty pikirtalastar kóńilinen shyqqandyǵyn jetkizdi. Dıplomat oppozısııa men úkimet ustanymdaryn jaqyndastyrý turǵysynan sırııaaralyq kelissózderdiń nátıjelerin paıdaly dep atady jáne kezdesýdi joǵary deńgeıde uıymdastyrǵany úshin Qazaqstan basshylyǵyna rızashylyǵyn bildirdi.
S. De Mıstýra Sırııa shıelenisin sheshý boıynsha saıası prosestiń qyza túsetindiginen úmttenetindigin aıtyp, barlyq múddeli taraptardy osy baǵytqa kúsh salýǵa shaqyrdy. Onyń pikirinshe, múddeli taraptarmen qolǵa alatyn «joǵary dıplomatııanyń» ýaqyty jetti, joǵary deńgeıdegi kezdesýler Sırııadaǵy beıbit ómirdi qalpyna keltirýge yqpal etýi kerek.
BUU janyndaǵy Qazaqstannyń turaqty ókili Qaırat Omarov óz sózinde Qaýipsizdik keńesiniń múshelerine sırııaaralyq kelissózderdiń 9-shy kezeńiniń qorytyndysy týraly málimet berip ótti. Sonymen qatar ol atalǵan máselelermen qatar taraptar Astanada ótken sońǵy 8 raýndtyq qorytyndylar boıynsha qol jetkizilgen kelisimderdiń júzege asyrylýyn qadaǵalaýdy qamtamasyz etý máselesi talqylanǵandyǵyn jetkizdi.
