Ulttyq biryńǵaı test tapsyrýdyń jaı-japsary týraly Almaty qalasy bilim basqarmasynyń basshysy G.M.Hodjabergenova baıandady. Bilim basqarmasy basshysynyń aıtýynsha, UBT tapsyrý erejelerinde aıtarlyqtaı ózgerister joq. Bıylǵy jyly Almaty mektepterin 9 153 túlek bitiretin bolsa, olardyń 81 paıyzy UBT tapsyrýǵa ótinish bildirgen, ıaǵnı testileýden ótetin túlekter sany – 7300. Al eń tómengi shektik ball – 50. UBT tapsyrý sertıfıkattaryn alǵan túlekter ádettegideı elimizdegi joǵary oqý oryndaryna oqýǵa túse alady. Al qalǵan túlekter elimizdegi kolledjder men shetelderde óz erkimen bilim alýǵa múmkindikteri bar. UBT tapsyrý merzimi mamyr aıynyń 29-y men 9 maýsym aralyǵyna qarastyrylyp otyr.
Orta mektep túlekteri mektep bitirý emtıhandaryn da, ulttyq biryńǵaı testileýdi de bes pán boıynsha tapsyrady. О́tken jyldarda túlekter UBT-ny qazaq, orys tilderinde tapsyrǵan bolsa, bıylǵy jyly Almaty qalasy boıynsha aǵylshyn tilinde tapsyrýǵa 46 túlek ótinish bildirgen.
Bilim basqarmasynyń basshysy ótken jyly Altyn belgi ıegeleri úshin memlekettik grantty bólý kezinde oryn alǵan olqylyqtardyń aldyn alý maqsatynda UBT tapsyrý erejesine ózgerister engizilgendigin eskertti. Eger Altyn belgi ıegerleriniń test tapsyrý qorytyndysy basqa túlektermen teń túsip jatqan jaǵdaıda, grant Altyn belgi ıegeriniń enshisine tıedi, al kerisinshe jaǵdaı oryn alǵanda, grant qatardaǵy talapkerge beriledi.
UBT qabyldaý pýnktteri jyldaǵydaı Almaty qalasyndaǵy segiz joǵary oqý ornyna bekitilgen. Naqty aıtqanda, Alataý aýdanynyń mektepteri – Halyqaralyq bilim berý korporasııasynda, Almaly aýdany – Almaty tehnologııalyq ýnıversıtetinde, Áýezov aýdany – QazUAÝ, Bostandyq aýdany – ál-Farabı atyndaǵy QazUÝ, Jetisý aýdany – Halyqaralyq bıznes ýnıversıtetinde, Medeý aýdany – Abaı atyndaǵy QazUPÝ, Naýryzbaı aýdany – Qazaq memlekettik Qyzdar pedagogıkalyq ýnıversıtetinde, Túrksib aýdanynyń mektepteri Narhozda tapsyratyn bolady. UBT qabyldaý pýnktteri test tapsyrý qaýipsizdigin qamtamasyz etý maqsatynda arnaıy qural-jabdyqtarmen qamtamasyz etilgen.
Elvıra SERIKQYZY,
«Egemen Qazaqstan»
