Bójildek kókemniń... (qudaı ózi keshirsin, shyn atyn umytyppyn) myna ómirge, qorshaǵan ortaǵa, sonyń ishinde bizge degen ókpe-renishinde shek joq. Alda-jalda aýylǵa bir at izin salyp bara qalǵanda, amandasa almaı ketseń, kelesi joly mindetti túrde:
– Estidim. Áneýgúni kelip ketipsiń. Osy kókemniń qolyn ap, sálem bereıin deýge jaramadyń-aý? – dep torsańdap turady.
– Oı, kóke, keshirińiz, óte asyǵys bop...
– Áne, bizge kelgende sóıtesiń. О́miri qolyń da tımeıdi, jolyń da túspeıdi. Kedeı kóke kimge kerek deseıshi odan da!
Ári qaraı aqtalyp jatýdyń ózi artyq.
Al keıde, sáti túsip, arnaıy qolyn alaıyn dep bara qalsań... apyr-aı, qara aspandy tóndirip, jer jahandy sýǵa alǵyzyp bójildeı jóneledi. «El búlindi, adam azdy, mal azaıdy, kórshi-qolań shetinen kúnshil, ury...» Qoıshy, áıteýir, barlyq pále úıilip-tógilip, bir páste bizdiń aýyldyń basyna kep tóne qalady.
«Ash qulaqtan, tynysh qulaq jaqsy» degen. Budan keıin úndemeı-aq qutylýǵa asyǵasyń.
Es bilgeli osy úıde bir qýanysh, úlken toı bolypty degendi estigen emespin. Qudaı ózi Bójildek kókeme saı etip qosqan Qaraqyz sheshem kelinderimen syıyspaǵan soń, balalary enshisin de almaı, jan-jaqqa kóship ketken...
Mine, búgin de Bójildek bój-bój etip, qaraǵashtyń túbine jınalǵan bir top kisiniń ortasynda qaqsap-sarnap otyr.
– Á-á, keldiń be, bala? – dedi meniń usynǵan qolymdy samarqaý ǵana alyp. –Úkimette ne jańalyq? Pensııany kóbeıtemiz deı me?..
– Bilmeım...
– Jaǵdaı ońbaı tur deseıshi.
– Endi...
– Aıtam ǵoı!..
Al sodan, bastaldy da ketti. So baıaǵy taýsylmaıtyn góı-góı. Qarap otyryp sharshaısyń. Jigeriń qum bolady. Tózimiń taýsylady. Al sodan soń, qoldy bir-aq silteısiń...
Qaıtyp kele jatyp osy kókemniń qaısybir jyly aqsha aýysqanda eki aıaǵy jerge tımeı, bir túıinshek aqshasyn qoltyǵyna qysyp alyp, aýystyratyn jer tappaı, kúndiz-túni sabylǵany esime tústi.
Sonda jurt oǵan kúlip edi-aý!
«Apyr-aı, ánsheıinde aýzynan «joqtan» basqa sóz shyqpaıtyn Bójildek baı eken ǵoı, bilmeı júrippiz!» desken.
Al men bolsam, qazir de osy kókemniń kedeı ekenine birtúrli senbeımin.
Nurǵalı ORAZ,
«Egemen Qazaqstan»
