Erteńine tań ata jeńeshem Montaıdan alyp kelgen kók sıyrymyzdy padaǵa qosyp, óriske shyǵaryp jibergen eken. Tús mezgilinde tańdaıy keýip, ábden qatalap shóldep, esik aldynda entigip turǵanyn bir-aq kórdik. Eki kózi tumandanyp, syrtqa shyqqan kisige mólıe qarap «Mó-ó-ó!» dep móńirep sý suraıdy.
Sóıtsek Baqyrsha álimsaqtan beri sýsyz otyrǵan alaqandaı aýyl eken. Jańa ǵana tanysqan kórshilerimiz «Kúnara Shaǵyr jaqtan sý ákeletin jalǵyz «vodavoz» bar edi, sol qurymaǵyr, buzylyp qalǵan ba, nemene, eki-úsh kúnnen beri tóbesin kórsetpedi ǵoı!» dep otyr.
Ádettegideı shaı-sýlaryn únemdep, ózderine ázer jetkizip otyrǵan sol úılerden áýelde «Jalǵyz sıyrymyz bar edi, bir shelek sý bere turmas pa ekensizder?» dep suraýǵa da uıaldyq. Al kók sıyr bolsa, birese esikten, birese terezeden syǵalap qaıta-qaıta móńirep júr. Birazdan soń tipti eki kózinen sorǵalap jas ta aǵyp ketti.
Biz úıde áreń shydap, ishimizden tynyp otyrmyz. Endi bolmasa, kók sıyrǵa qosylyp, ózimiz de jylap jiberetin sııaqtymyz. Sebebi oǵan aparyp bere qoıatyn sý joq...
Sol kúni baıǵus sıyrdyń shólin qalaı qandyrǵanymyzdy qazir umytyp qalyppyn. Biraq kózinen jas parlap, móńirep jylaǵany áli kúnge sheıin esimde.
Sodan bastap ol aýyldan alysqa uzap jaıylmaıtyn boldy. Tań bozynan tabynǵa qosyp, padashyǵa yqtııattap tapsyryp-aq jiberemiz. Biraq kún kókjıekten arqan boıy kóterilmeı jatyp aýylǵa qashyp keledi de, aınaladaǵy qora-qopsyny tintip, aınalshyqtap júrip alady.
Ondaı kezde jeńeshem bizge «Áı, úıde qur bosqa qarap otyrǵansha anaý sıyrdy aýyl shetine aıdap shyǵyp, ózderiń jaıyp kelińder», deıdi. Sonsoń bir taıaqty qolymyzǵa ala salyp, «О́k áı, ók!» dep qýa jónelemiz.
Biraq ol da ońaılyqpen yryqqa kónbeı, ári-beri bultalaqtap úıge qaraı qashady. Sonda onyń kózinen «Esterińde me, áneýgúni Japatastyń etegine deıin jaıylyp baryp, shóldep qaıtqanymda bir tamshy sý taýyp bere almap edińder ǵoı. Endi qaıtip baram? Jo-joq, odan da ólgenim artyq!» degen sózdi oqyǵandaı bolamyz.
Kóp ótpeı-aq bizdiń kók sıyr álgi aýyldaǵy eń bir suǵanaq, uıatsyz, ury sıyrǵa aınalyp shyǵa keldi. Kimniń aýlasynyń esigi ashyq qalsa, sol úıge kirip baryp, sýyn iship, dastarqanǵa orap qoıǵan nandaryn jep, qaptaǵy uny men kúrishin tógip-shashyp, oırandap ketetin boldy.
Oǵan árıne, tabıǵatpen birge biz de ózimizdi kináli sezinetinbiz.
Nurǵalı ORAZ,
«Egemen Qazaqstan»
