Jazdygúni tapshanda jatyp uıyqtaǵan raqat qoı, shirkin. Alqarakók aspandaǵy juldyzdar jypyrlap, jer betine jaryq túsirgisi kelgen myń-san bilte shamdar sekildi jymyńdap turady. Aýa taza. Dala tynysh.
Kókem búgin jumystan óte kesh keldi. Aıtýyna qaraǵanda, «aıaq astynan aýdannan bir top kámasııa sap ete qalǵan» kórinedi. Sodan ba, qazir kúndegisinen de qatty qoryldap, búkil dalany basyna kóterip jatyr. Al men bolsam, qannen-qapersiz pysyldap uıqyǵa ketken eki inimniń mańdaıynan kezek-kezek sıpap qoıyp, túpsiz, tuńǵıyq tátti qııalǵa shomam.
Kenet túngi tynyshtyqty selk etkizip, jaqyn mańnan bir nárse gúrs ete qaldy.
– A-a? – dep shoshyp oıandy kókem.
Mende de záre qalmady. Iаpyr-aı!.. Bu ne boldy eken?! Myltyq pa?.. Myltyq bolsa, tún ishinde ony atyp júrgen kim?..
Sálden soń syqyrlap úıdiń syrtqy esigi ashyldy. Ájem eken.
– Áı, ne boldy?! – dedi tapshanǵa qarap daýystap.
– Bilmeım, – dedim men.
Ákem ún qatqan joq. Kirpigi aıqasyp, qaıtadan uıyqtap bara jatqandaı kórindi.
– Baqsha jaqta birdeńe tars etip atyldy ǵoı. Baryp bilseńdershi...
Kókem qybyrlap ornynan tura bastady. «Qoryldasa da bárin estip jatyr eken ǵoı», degen oı keldi maǵan.
Qarańǵy túnde máıkisi aǵarańdap baqsha jaqqa qaraı ketken kókem birazdan soń qolyna bir jarylǵan qarbyzdy ustap qaıtyp oraldy.
– Mynaý eken ǵoı adamnyń uıqysyn buzǵan, – dedi ájeme qarap kúńkildep.
– E-e, qudaı-aı, qarbyz ba edi... Ábden pisip, eshkim úzip almaǵan soń, qanasyna syımaı tars etip atylǵan da jaryqtyq.
Qaradan qarap rásýa bolǵan qarbyzǵa ájemniń jany ashyǵandaı boldy.
– Iá-á... Atylatyn ýaqytty tapqan eken... – dep kókem qarańǵyda aıaǵyna qońyltaıaq kıe salǵan eski kálóshti sheship, óz ornyna baryp qaıtadan qısaıa ketti.
Al ájem bolsa, álgi qarbyzdyń qabyǵyna qarap tamsanyp:
– E-e, Alla, kórsetkenińe shúkir, – dedi aqyryn ǵana kúbirlep. – Shól daladan sý shyǵady, el-jurt ketpen shaýyp, baý-baqsha egedi, sóıtip tún ishinde tarsyldap qarbyz atylady dep kim oılaǵan. Buryn bul Baqyrshada bir jutym sýǵa zar bop, tańdaıymyz keýip otyrýshy ek qoı... Toba, toba-a!..
Ájemniń daýsy alqarakók kórpe jamylyp, typ-tynysh, tym-tyrys maýjyrap jatqan jer betindegi tirshilikke alǵys aıtyp turǵandaı sheksiz meıirimge toly edi.
Nurǵalı ORAZ,
«Egemen Qazaqstan»
