Astanada Prezıdent Nursultan Nazarbaevtyń qatysýymen ótip jatqan «Nur Otan» partııasy Saıası keńesiniń keńeıtilgen otyrysynda senator Baqytjan Jumaǵulov Bes áleýmettik bastamany iske asyrýda qoǵamdyq baqylaý qolǵa alynǵanyn aıtty. Aıta keterligi, «Nur Otan» partııasynyń muryndyq bolýymen Prezıdenttiń Bes áleýmettik bastamasynyń júzege asyrylýyn baqylaý jónindegi Qoǵamdyq keńestiń tóraǵasy bolyp Baqytjan Jumaǵulov taǵaıyndalǵan bolatyn.
«Elimiz úshin erekshe mańyzy bar, halyqtyń kemel keleshekke degen senimin nyǵaıtqan Bes áleýmettik bastamańyz elde úlken úmitpen qabyldanyp, qoldaý taýyp jatyr. Osy ıgi isti baqylaýdy «Nur Otan» partııasyna tapsyrdyńyz. Bul árbir nurotandyqqa degen úlken jaýapkershilik pen senim dep bilemiz. Osyǵan oraı, qoǵamdyq keńes qurylyp, óz jumysyn bastady. Bizge júktelgen maqsat-mindetter aıqyn ári anyq. Eń bastysy mindetimiz - bastamalardy tıimdi júzege asyrý úshin partııanyń jáne qoǵamnyń belsendi kúshterin jumyldyryp, memlekettik organdarǵa jan-jaqty kómek kórsetý. Sondyqtan, Qoǵamdyq keńeske aýqymdy mindetter júktelip otyr», - dedi Baqytjan Jumaǵulov.
Atap aıtqanda, birinshiden - Bes áleýmettik bastamanyń júzege asýyna qoǵamdyq monıtorıng jáne baqylaý jasaý, úılestirý. Ekinshiden - áleýmettik bastamalardyń júzege asyrylýy týraly aqparatty halyqqa der kezinde jetkizý. Úshinshiden - bastamalardy júzege asyrý kezindegi máselelerdi anyqtaý jáne olardy sheshý jóninde usynystar daıarlap, memlekettik organdarǵa olardyń sapaly oryndalýyna atsalysý.
«Úkimet bekitken Jol kartasy bizdiń osy baǵyttaǵy jumystarymyzdyń negizi bolyp tabyldy. Bes baǵyt boıynsha keńestiń jumys toptary jáne óńirlik keńester quryldy. Memlekettik organdar men jetekshi saıası partııalarmen, QHA, Ulttyq kásipkerlik palatasymen, Kásipkerlik federasııasymen, ÚEU-larmen birlese jumys isteýdiń turaqty mehanızmi qarastyryldy. Senat pen Májilistiń depýattyq korpýsy bastamalardy tıimdi júzege asyrýdy qamtamasyz etetin zańnamalardyń daıyndalýyna jáne qabyldanýyna júıeli qoldaý kórsetip keledi. Keńestiń 4 mamyr kúni ótken alǵashqy otyrysynda jáne odan keıin de jumys toptary boıynsha keńinen talqylandy. Oǵan barlyq jaýapty mınıstrlikter men Ulttyq bank ókilderi belsene qatysty», - dedi ol.
Qoǵamdyq keńes tóraǵasynyń sózin tyńdaǵan Prezıdent baqylaýdy naqty túrde júzege asyrý kerektigin atap ótti. «Qarjylyq baqylaý da júrgizilýi tıis. Men Natalıa Nıkolaevna Godýnovaǵa (Esep komıtetiniń tóraıymy - avt.) tapsyrdym. Baqylaý úshin birlese jumys atqarýy kerek. Árbir tıyn tıisti jerine jetýi kerek. Biz 2008 jylǵy daǵdarys kezinde dál osylaı jumys istegenbiz. Qazir de solaı jumys atqarý kerek», - dedi Nursultan Nazarbaev.
Sondaı-aq Elbasy «Dıplommen aýylǵa» baǵdarlamasyn toqtatpaý kerektigin basa aıtty. «Dıplommen aýylǵa» baǵdarlamasyn toqtpaýymyz kerek. Aýyldan báribir qalaǵa kóshý bar, ony toqtata almaısyń. Ýrbanızasııa búkil álemde júrip jatyr, bizde de bolady. Eger oǵan mamandyq berip týǵan aýylyna bekitip, jumysynyń bastapqy kezeńinde nazar aýdaratyn bolsaq, onda boı úıretip, jumys isteıtin bolady", - dep atap ótti Memleket basshysy.
Osy rette Elbasy jastardyń aýylda eńbek etýine jaǵdaı jasaýda «Nur Otan» jan-jaqty jumystar júrgizýi qajettigin basa aıtty. «Nurlanǵan Otan jasaımyz dep atyn qoıdyq qoı. Otan degenimiz - eliń, jeriń, otbasyń, bala-shaǵań. «Nur Otan» otanshyldardyń partııasy, Otanyn súıgenderdiń partııasy. «Otanyn súıgender - árbir óz azamatyn súıgender» dep sanaý qajet. Biz osyndaı bolýymyz kerek. Birinshi dárejedegi uıymdarymyz, aýdandarda, qalalarda, oblystarda bar. Olarǵa durys adamdardy qoıyp, jumys istete bilýimiz kerek. Ortalyqtan júrgizip jatqan máseleler, bizdiń qabyldap otyrǵan baǵdarlamalarymyzdyń barlyǵy qarapaıym adamdar úshin", - dedi Nursultan Nazarbaev.
