Sońǵy elý jyldaǵy úzdik bes romandy qazylar alqasyndaǵy bes adam saralaǵan. Olar: jazýshy, redaktor Robert Makkrým 1971 jylǵy syılyqtyń ıegeri Vıdıadhar Naıpaýldyń «Erkin elde» romanyn, aqyn Lemn Sıseı 1987 jylǵy jeńimpaz Penelopa Laıvlıdiń «Aı barysy» romanyn, romanıst Kamıl Shamsı 1992 jyly Býker syılyǵyna laıyq bolǵan Maıkl Ondatjeniń «Aǵylshyn pasıent» romanyn, romanıst, telejúrgizýshi Saımon Maıo Hıları Manteldiń 2009 jyly úzdik dep tanylǵan «Arlan alańy» romanyn jáne aqyn Hollı Maknısh byltyrǵy jeńimpaz Djordj Sonderstiń «Bardodaǵy Lınkoln» romanyn úzdik dep tapqan.
Býker syılyǵy qorynyń basshysy, baronessa Helena Kennedıdiń pikirinshe, bul qysqa tizim Býker syılyǵynyń eń úzdik kórkem shyǵarmaǵa beriletinin aıǵaqtaıdy. Osy tizimniń ishinen jeńimpaz syılyqtyń veb-saıtynda 26 mamyr men 25 maýsym aralyǵynda daýys berý arqyly anyqtalady. Jeńimpazdy Býker syılyǵynyń elý jyldyǵyna arnalǵan 6-8 shilde aralyǵynda Londonda ótetin jabyq festıvalda jarııalaıdy. Altyn Býkerdiń ıegeri kim bolaryn Astana kúninde biletin bolamyz.
Halyqaralyq Býker syılyǵy 2005 jyldan bastap Býker syılyǵyna qosymsha retinde bólek syılyq bolyp tabystalyp keledi.Syılyq aǵylshyn tiline aýdarylyp, Brıtanııada jaryq kórgen romandarǵa beriledi.
2018 jylǵy maýsymnyń úzdik jazýshysy Londondaǵy Vıktorııa men Albert mýzeıinde anyqtaldy. Polıak jazýshysy, aqyny Olga Tokarchýk syılyq laýreaty atandy. «Begýny» romanyn aǵylshyn tiline aýdarǵan – Djennıfer Kroft. Syılyqtyń sharty boıynshy 67 myń AQSh dollary bolatyn syıaqy avtor men aýdarmashynyń arasynda teńdeı bólinedi.
Olga Tokarchýk Polshada tanymal, birneshe bestsellerdiń avtory. Halyqaralyq Býker syılyǵyn alǵan tuńǵysh polıak jazýshysy bolyp otyr. Varshava ýnıversıtetinde psıholog mamandyǵyn alǵan Olganyń shyǵarmashylǵyna Iýngtyń áseri baıqalady. Alǵashqy óleńder jınaǵy 1989 jyly jaryq kórgen. Osy kúni 8 romannyń, 2 áńgimeler jınaǵynyń avtory. Jazýshylyqpen qosa jyl saıyn ózi turatyn tómengi Sılezııada ádebı býtık festıvalin uıymdastyrady.
Aýdarmashy Djennıfer Kroft polıak, ýkraın, ıspan tilderinen erkin aýdarma jasaıdy. Kórkem aýdarma mamandyǵy boıynsha Aıova shtatynyń ýnıversıtetin támamdaǵan.
Daıyndaǵan Baǵashar TURSYNBAIULY,
«Egemen Qazaqstan»
