Semeı qalasyna qarasty Qaınar aýylynda Asqarbek Saılaýǵalıev esimdi jas aqyn turady. Bıyl osy aýyldaǵy Saparǵalı Begalın atyndaǵy orta mekteptiń 3 synybyn bitirgen ol ózi óleń ǵana shyǵarmaıdy, Abaı Qunanbaev, Muqaǵalı Maqataev sııaqty qazaqtyń ataqty aqyndarynyń jyrlaryn jatqa oqıdy. Bolashaǵynan zor úmit kúttiretin balǵyn jaqynda Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy negizinde júzege asyrylǵan «100 jańa esim» jobasy aıasynda jınaqtalǵan «OZATTAR» Qazaqstan bilim salasy úzdikteriniń ensıklopedııasyna enip, «Qazaqstan úmiti» tósbelgisimen marapattalypty.
«Balam eń alǵash 4 jasynda Abyraly óńiriniń týmasy, qazaqtyń talantty aqyndarynyń biri Tóleýjan Ysmaıylovtyń óleńderin mánerlep oqýdan ótken saıysta 1 oryn ıelengen bolatyn. Asqarbek negizinen Muqaǵalı Maqataevtyń óleńderin oqyǵandy jaqsy kóredi. Jýyqta «Qara óleńniń qulageri» atty II respýblıkalyq Muqaǵalı Maqataev oqýlarynda III oryn alyp, «Muqaǵalı murageri» tósbelgisiniń ıegeri atandy», - deıdi jas aqynnyń anasy Asylgúl Batyrbekova.
Anasynyń aıtýynsha, Asqarbek qazir Qaınardaǵy ortalyqtandyrylǵan kitaphananyń turaqty oqyrmandarynyń birine aınalypty. Kitaphana ujymy óleńqumar órendi 2017-2018 oqý jylynda «Kitapty eń kóp oqıtyn oqyrman» nomınasııasymen marapattapty. Toǵyz jastaǵy aqynnyń ózimen telefon arqyly sóıleskenimizde kitaphanadan Sultanmahmut Toraıǵyrov óleńderi men Beıimbet Maılın áńgimelerin oqyp júrgenin aıtyp berdi.
Azamat QASYM,
«Egemen Qazaqstan»
Semeı qalasy,
Qaınar aýyly
