О́nerkásip salasynda jyl basynan beri oń dınamıka qalyptasyp, esepti merzimde bul salada 165,7 mıllıard teńgege ónim óndirilgen. Bul ótken jyldyń tıisti kezeńimen salystyrǵanda 12,3 paıyzǵa ósken. Onyń ishinde ósim taý-ken ónerkásibinde 15,6 paıyzdy, óńdeý ónerkásibinde 12,5 paıyzdy, elektrmen jabdyqtaý, gaz, bý berý jáne aýa baptaý 8,8 paıyzdy, sýmen jabdyqtaý, káriz júıesi qaldyqtardyń jınalýyn jáne taratylýyn baqylaý 2,2 paıyzdy qurady.
Bul – respýblıka óńirleri arasyndaǵy úshinshi oń kórsetkish jáne ortasha respýblıkalyq kórsetkishten 6,9 paıyzdyq tarmaqqa joǵary. О́ńir ekonomıkasynyń taǵy bir basty salasy – aýyl sharýashylyǵynda ústimizdegi jyldyń esepti merziminde 39,4 mıllıard teńgeniń ónimi óndirildi. Onyń ishinde mal sharýashylyǵynda ósim 4,2 paıyzdy qurap, 38,7 mıllıard teńgege deıin jetken. О́sim negizinen et óndirý kóleminiń 4,9 paıyzǵa, sút óndirý kóleminiń 3,6 paıyzǵa, jumyrtqa óndirisiniń 1,2 paıyzǵa artýy sebebinen qamtamasyz etildi. Bul – respýblıka óńirleri arasyndaǵy besinshi kórsetkish jáne ortasha respýblıkalyq kórsetkishten 0,1 paıyzdyq tarmaqqa joǵary.
Esepti merzimde negizgi kapıtalǵa salynǵan ınvestısııa kólemi 7,3 paıyzǵa artyp, 69,6 mıllıard teńgeni qurap otyr. О́sim Jýaly aýdanyndaǵy «Býrnoe solar» kún elektrostansasyna qural-jabdyqtar alýǵa, Moıynqum aýdany «Org-Stroı» JShS-niń fılıalynyń árleý tastaryn óndiretin jáne óńdeıtin zaýyt qurylysyn salýǵa jáne Sarysý aýdanynda «EvroHım Qarataý» JShS hımııalyq tyńaıtqyshtar óndiretin zaýyt qurylysyna ınvestısııany tartý esebinen qamtamasyz etildi. Bul – respýblıka óńirleri aralyǵynda on birinshi kórsetkish.
Jambyl oblysynda búginde qurylys jumystarynyń kólemi 24,9 mıllıard teńgeni nemese ótken jyldyń qańtar-mamyr aıyna 119,8 paıyzdy qurady. О́sim Taraz qalasynda kóppáterli turǵyn úıler men eki mekteptiń, Talas aýdanynda magıstraldy gaz qubyrynyń jáne Shý aýdanynda kireberis temirjol qurylystarynda qurylys-montaj jumystar kóleminiń ulǵaıýyna baılanysty bolyp otyr. Bul – respýblıka óńirleri aralyǵynda úshinshi oń kórsetkish jáne ortasha respýblıkalyq kórsetkishten 19,5 paıyzdyq tarmaqqa joǵary.
Jambyl oblystyq ákimdiginiń málimetinshe, aǵymdaǵy jyldyń bes aıynda ótken jyldyń tıisti kezeńinen 20,6 paıyzǵa artyq jáne jalpy kólemi 152,7 myń sharshy metrdi quraıtyn turǵyn úı paıdalanýǵa engizildi. Bul – respýblıka óńirleri aralyǵynda jetinshi kórsetkish jáne ortasha respýblıkalyq kórsetkishten 17,9 paıyzdyq tarmaqqa joǵary.
– Jalpy, ekonomıkanyń barlyq negizgi salalary boıynsha esepti merzimde Jambyl oblysynyń 2018-2022 jyldarǵa arnalǵan áleýmettik-ekonomıkalyq damý boljamynda belgilengen josparly mánderden asyra oryndalyp otyr. Inflıasııa deńgeıi 102,2 paıyz deńgeıinde qalyptasty jáne bul kórsetkish ortasha respýblıkalyq mánnen 0,2 paıyzdyq tarmaqqa tómen. Azyq-túlik taýarlaryn tutyný baǵasy 2,9 paıyzǵa, azyq-túlik emes taýarlar 2,3, al aqyly qyzmetter 1,4 paıyzǵa artty. Bıýdjettiń kiris bóligi aǵymdaǵy jyldyń 1 mamyryna 97,2 mıllıard teńgege nemese 105,5 paıyzǵa oryndaldy – deıdi Jambyl oblystyq ekonomıka jáne bıýdjettik josparlaý basqarmasynyń basshysy Gúldana Jaýynbekova.
Hamıt ESAMAN,
«Egemen Qazaqstan»
