Bir belgilisi, «Baıkenov» kásipkerligi bul jer telimin Zataevıch kóshesi, 33-úı mekenjaıynda ornalasqan kóppáterli úıdiń aldy dep satyp alǵan. Sóıtip M.Áýezov dańǵyly men Pobeda kóshesiniń qıylysyn ózinshe «retke» keltire bastaıdy. Turǵyndardyń aıtýy boıynsha, jeke kásipker aýksıon arqyly bul jerdi aldym dep, osyndaǵy balalar alańyn buzyp, biraz aǵashty kesip tastaǵan. Halyq daýlap otyrǵan kóppáterli úıdiń syrt jaǵy Zataevıch, 33-úıdiń janynda ornalassa, bir buryshy M.Áýezov dańǵyly men Pobeda kósheleriniń qıylysyna kelip tireledi eken. Turǵyndardyń basym kópshiliginiń aıtýlarynsha, bul daý osydan týyndap otyr.
Jýyrda qala ákimi Ermak Sálimov osy daýǵa qatysty jergilikti turǵyndarmen kezdesýge keldi. Onyń aıtýynsha, bul sheshim ózine deıingi ákimderdiń kezinde qabyldanǵan. Qazir ákimdik halyqtyń jaǵdaıyna, talap-tilegine qaraı áreket etýge daıyn, biraq daýly másele zań boıynsha tek sot arqyly ǵana sheshiledi.
– Semeıge basqa ákim basshy bolǵan kezde M.Áýezov dańǵyly men Pobeda kóshesiniń arasyndaǵy jerdi alýǵa kásipkerge tyıym salý kerek edi. О́kinishke qaraı, olaı jasalmaǵan, – deıdi qala basshysy. – Osylaısha maǵan únemi ótken jyldyń osy taqylettes daýly dúnıelerin sheshýmen aınalysýǵa týra kelip tur. Jylyn qarasańyzdarshy, alǵashqy aýksıon 2014 jyly ótken. Men ol kezde ákim bolǵan joqpyn. Biraq dál qazirgi ýaqytta halyqtyń muń-muqtajyn qarastyrmaı qoıa almaımyn. Sizderge kómektesýge ázirmin.
Qala ákimi daýly jerdi memleket qazynasyna sot arqyly qaıtarǵan jón dep sanaıdy. Biraq «Baıkenov» JK basshysy Anar Baıkenova «Atameken» ulttyq kásipkerler palatasy men oblys basshylyǵyna shyǵyp, jer telimin qaıtarýdan úzildi-kesildi bas tartypty.
– Meniń sózimdi nege eshkim estigisi kelmeı tur? – deıdi Anar Amangeldiqyzy. – Iá, «Baıkenov» kásipkerlik nysany bul jerdi aldy. Endi abattandyramyn desem de, eshkimniń tyńdaǵysy joq. Sol sebepten Ulttyq kásipkerler palatasyna shyǵýyma týra keldi. Alǵan jerimdi qorshap qoıǵanym sol-aq edi, qarsylasqan topqa tap boldym. Qolymdaǵy qujattarym barlyq talapqa saı. Aǵashtardy kesip tastady deıdi, biraq bul jerge osyǵan deıin eshkim nazar aýdarmaı, qoqys bolyp jatyr edi. Meniń turǵyn úıdiń aldyna záýlim nysan salmaıtynym túsinikti ǵoı. Bireýler turǵyndardy ádeıi shatastyryp otyr.
Qala ákimi Ermak Sálimovpen kezdesken turǵyndardyń Anar Baıkenovaǵa qarsy ýáji bar. Olardyń aıtýlarynsha, bul jerde ósip turǵan aǵashtardy kesip tastap, ornyn kógaldandyramyn deýdiń qajeti joq. Osy úıde 38 jyldan beri turatyn Irına Bezrodnaıa bul tusta shaǵyn baq bolǵanyn, oǵan ózi kóshet ekkenin aıtady. Satyp alýshy aǵashtardy qalaı keskenin kózimen kórip, jylap turyp beınejazbaǵa túsirip alypty.
– Men Zataevıch kóshesi, 35-úıdiń turǵynymyn, – dedi sábıin kóterip kelgen jas ana Aınur Jambolatova. – Bul jerge qalaı ǵımarat salmaqshy? Burynǵy ákimder buǵan qalaı ruqsat etken? Jaz boıy qurylys jumystaryn júrgizse, mańaıdyń bárine shań kóterilip, tóńirek astań-kesteń bolmaq. Ol óz aldyna, eger qandaı da bir ǵımarat salsa, myna mańaıda árli-berli júrýdiń ózi qıyndap qalady. Kórip tursyzdar, aıadaı ǵana jer. Erteń tótenshe jaǵdaı bola qalsa, órt sóndirýshiler men qutqarýshylardyń kólikteri qalaı ótedi?! Sony nege oılamaıdy?! Aınalanyń bári qaptaǵan dúken, túrli kásipkerlik nysandar. Demalatyn jer qalmady, aǵashtardy kesip tastady.
Tıisti zań talaptary boıynsha, qala ishindegi jer telimderi jalpy ortaq qoldanystan alynǵan jaǵdaıda ǵana jeke menshikke berilýi múmkin. Biz aıtyp otyrǵan máselede bul jaıt eskerilmegen syńaıly. Aýksıonǵa túsken jerdiń mekenjaıy: Zataevıch, 35 «A» dep kórsetilgen. Biraq jer M.Áýezov dańǵyly men Pobeda kóshesiniń qıylysynda tur. Bir qyzyǵy, bul jer teliminiń satylatyndyǵy týraly qalanyń qoǵamdyq keńesi de, qala qurylysy bólimi de habarsyz bolǵan.
Qala ákimdigi jaǵdaı tolyq sheshimin tapqanǵa deıin kásipker Anar Baıkenovaǵa qurylysyn júrgizýge tyıym salǵan. Turǵyndardyń narazylyǵyna baılanysty jumys toqtap qalǵan kezde qurylys alańy qorshalǵan kúıi qala beripti. Turǵyndardyń ótinishine qulaq túrsek, bul jerde buryn bolǵan shaǵyn saıabaqtyń qalpyna keltirilgenin qalaıdy. Qala ákimi Ermak Sálimov bolsa tıisti sot sheshimi shyqqan soń bul jerge jańadan aǵashtar otyrǵyzylyp, balalar oınaıtyn alań ashylady dep otyr.
Raýshan NUǴMANBEK,
jýrnalıst
SEMEI
