18 mamyrda elimizde JITS-ten qaıtys bolǵan adamdardy eske alýdyń halyqaralyq kúnine oraı, «Umytpaımyz! Bilemiz! Jeńemiz!» atty respýblıkalyq naýqan bastaldy. Bul shara Almatydaǵy respýblıkalyq JITS ortalyǵynan bastaý aldy.
JITS-ten qaıtys bolǵandardy eske alýda AITV indetine tap bolǵan adamdarǵa nıettestigin bildirý úshin memlekettik, halyqaralyq, dinı jáne úkimettik emes qoǵamdyq uıymdardyń ókilderi, medısına qyzmetkerleri, stýdentter, medıalyq tulǵalar jınaldy. Atalmysh aksııaǵa JITS-tiń aldyn alý jáne oǵan qarsy kúres jónindegi respýblıkalyq ortalyǵy, Almaty qalasynyń Densaýlyq saqtaý basqarmasy, «AITV-men ómir súretin adamdardyń qazaqstandyq odaǵy» zańdy tulǵalar birlestigi, IýNEIDS, Almaty qalasynyń JITS ortalyǵy, S.D.Asfendııarov atyndaǵy Qazaq ulttyq medısınalyq ýnıversıteti, PSI uıytqy boldy.
– Bul naýqannyń maqsaty – indet jalmaǵan adamdardy eske alýmen qatar, halyqty AITV-men ómir súretin adamdarǵa (AО́A) túsinistikpen qaraýǵa shaqyrý. Atalǵan sanattaǵy adamdardyń densaýlyǵyn saqtaý úshin búgingi tańda memleket olarǵa tegin túrde antıretrovırýstyq terapııa usynýda. Emdeý kesteleri únemi jaqsartylyp otyrady, jańa antıretrovırýstyq preparattar satyp alynýda. Jyldan-jylǵa JITS-ten bolatyn ólim-jitim aıtarlyqtaı tómendep keledi, – deıdi JITS-tiń aldyn alý jáne oǵan qarsy kúres jónindegi respýblıkalyq ortalyqtyń bas dırektory Baýyrjan Baıserkın.
Qazaqstanda AITV indetiniń bastalǵan sátinen bastap JITS-ten 9 myńnan astam adam qaıtys bolǵan. Degenmen indettiń alǵashqy jyldarynda AITV-men ómir súrip júrgen adamdarda dárilerdi tańdaý múmkindigi bolmaǵandyqtan, bir jylda 280 adam qaıtys bolǵan. Al qazir túbegeıli sharalardy qabyldaý nátıjesinde bul qarqyn aıtarlyqtaı tómendedi. AITV juqtyrǵan balalar tek túpnusqalyq preparattardy qabyldaıdy. AITV-niń anadan balaǵa berilýin toqtatý úshin barlyq júkti áıelder AITV-ge eki ret tekserile alady. Al testileý jasaý elde tegin, erikti, qalaýy boıynsha qupııa túrde júrgiziledi. Jyl saıyn AITV-ınfeksııasyna testileýden ótip júrgen qazaqstandyqtardyń sany artýda. Jaǵdaı baqylaý satysynda tur.
Aksııa kezinde qajet dep tapqandar AITV-ınfeksııasyna jedel-testileýden ótýge múmkindik aldy. Vıktorınalyq saýaldarǵa qatysyp, óz dertin jarııa etken suraqtar qoıdy.
Mundaı derttiń bar ekenin qashanda qaperde ustaý úshin ári qaraı naýqan elimizdiń barlyq aımaǵynda ótkiziletin bolady.
Aınash ESALI,
«Egemen Qazaqstan»
ALMATY
